VIDEO Avannaata qimussersuata ingerlanneqarnerani qimmit nappaalalersinnaapput
Qimussit 40-t tikillugit amerlassuseqartut peqataanissaat naatsorsuutigineqarpoq, tamannalu isumaqarpoq qimmit qanittumeersut ungasissumeersullu sapaatip akunnerata missaani sivisunermiluunniit Uummannami katersuuteqqassasut.
- Qimmiutilippassuilli nammineerlutik qimmitik qimmit nappaataannut parvo-virusimullu akiuussutissamik kapineq ajoraat, uumasut nakorsaata aviisimut uppernarsarpaa.
Qimmimmi sivisuumik qulimiguulimmik imaatigulluunniit angallatinik angalanneqarnerminni uisakajaartinneqarunik qimussimik unammisoqarnerani nappaatinik tuniluuttoornissaaat aarlerinartoqartoq, aviisi allappoq.
Qimminullu akiuussutissamik kapisisarneq maanna nammineq kajumissutsimik pisartoq tamanut atuuttussanngorlugu piumasaqaataalernissaa, Sanne Wennerbergip neriuutigaa.
- Qimusserlunimi unammisoqareernerani qimmit nappaatinik angerlamut nassataqarnissaat aarlerinarpoq, taamaalinikkummi nunatsinni nappaat siaruaassinnaammat, Sanne Wennerberg oqarpoq.
Qimmit pingitsooratik kapitittalernissaat uumasut nakorsaata neriuutigisaa Kalaallit Nunaanni Qimussertartut Kattuffianni allatsip Hansiaraq Zeebip aamma taperserpaa.
- Piareersaatissaqarluartariaqarpugut, nappaatimmi tuniluutissagaluarpata qimussernermut piorsarsimassutsitsinnut kingunerluuteqarujussuarsinnaavoq, Hansiaraq Zeeb oqarpoq. Tamannalu kattuffimmi tulliani ataatsimiinnermi eqqartorniarpaa.
Qimmilli nappaataanut parvo-virusimut, perlerornermullu akiuussutissat kommunemi uumasulluunniit nakorsaanni pissarsiariniarnerat ajornakusoortartoq, Ilulissani qimmussertartut peqatigiiffiata Qimussersap siulittaasuata, Ville Siegstadip oqaatigaa.
