Avannaata Qimussersuanut peqataasinnaajunnaartorpassuit

Pilersaarutit malillugit Avannaata Qimussersuani peqataasussat 33-usussaagaluarput. Peqataasussalli 20-it ippassingami utiinnartariaqarsimapput Nassuttuup paavani sikunit qaleriiaartunit assertikkamik. Ima sikorpassuaqartigisimavoq angallatit angisuut ingerlariaqqissinnaajunnaarsimallutik allatullu ajornarmat illoqarfigisaminnut utiinnarsimapput.

- Taamaasilluni peqataasussat 13-iinnaasussanngorput. Pinngortitaq tassa taama atugassaqartitsivoq allatullu ajornarmat tamanna uagut maliinnartariaqarparput, taama KNRimut oqarpoq Kalaallit Nunaanni Qimussertartut kattuffianni KNQK-mi siulittaasoq Mikkel Jeremiassen.

Peqataasussaagaluit utiinnartut tassaapput Kangaatsiarmiut, Aasiammiut, Qeqertarsuarmiut Qasigiarmiullu. Peqataasussat arfineq pingasut Ilulissaniit, Qeqertamiit Saqqamiillu aggersut Dash 7 atorlugu Sisimiunut anngupput sukkaniuffissartillu atuareerlugu.

Uummannarmiut Upernavimmiullu ukioq siusinnerusukkut nalunaarput peqataasinnaajunnaarlutik taavani sikkorlunnera pissutigalugu anngunniunnerit ingerlanneqarsinnaasimanngimmata.

Avannaata Qimussersuani unammeqataasussat 13-it 40 kilometeri ingerlavigissavaat arfininngorneq marsip 26-iat. Peqataasut siornatigut ikinnerusimapput pinngortitap killiliineratigut. Sukkaniunnersuaq Upernavimmi1996-mi ingerlanneqarmat peqataasut taamanikkut quliinnaapput.