Avannaata Qimussersuanik aallarniisoq toqukkut qimaguppoq
Qimussimik sukkanniuttarnermut nuannarineqarluartumut, Avannaata Qimussersuanut, Uummannami ukioq 1989-imi siullermeerluni ingerlanneqartumut aallarniisoq, Ole Qvist, 69-inik ukioqarluni toqukkut qimaguppoq.
Ole Qvist Qimusseq 85-imi siulittaasuunermi nalaani Avannaata Qimussersuanut aallartitsisuuvoq.
Avannaata Qimussersua Upernavimmiunit, Uummannarmiunit aamma Qeqertarsuup Tunuarmiunit peqataaffigineqarluni siullerpaamik Uummannami 1989-imi ingerlanneqarpoq.
Unammisarnerlu taanna kingorna ineriartortinneqarluni nuna tamakkerlugu qimminik qimuttoqarfinnit peqataaffigineqarsinnaasumik ingerlanneqartalerpoq.
AAMMA ATUARUK Efter hundeslædesnyd: En plads i historiebøgerne er vigtigere end præmien
- Tassa inuiaqatigiit annaasaqarpugut qimussernikkut pingaartitsitsilluinnartumik. Aammalu tunngavissiilluni maannamut kingornussassatsinnik tunisimavaatigut 1989-imit siullermeerneqarnerani aallarniiffigalugu. Maannamut suli ingerlavoq. Taannalu aamma inuiaqatigiinnut tunniutaa imaaliinnarlugu unitsinneqarnavianngilaq, Mikkel Jeremiassen oqarpoq.
Mikkel Jeremiassen Kalaallit Nunaanni Qimussertartut Kattuffianni ukiuni 18-ini siulittaasuuvoq, maannalu siulittaasup tulliulluni
Ukioq manna Avannaata Qimussersuaqarnerani pisut nuannerpallaanngitsut assigiinngitsut pillugit Ole Qvist KNR-imut maajimi ilaatigut oqarpoq Avannaata Qimussersua inuit nuannaartinniarlugit pilersitaasoq.
- Inuinukua nuannaartinniarsaralugit aammalu qimminnguaminnik paarsilluarnerulernissaat siunertaralugu aallarniigaluartugut.
Ole Qvist Aasianni aamma najugaqarnikuuvoq, tassanilu aamma qimussimik sukkanniunnermik aallutaqartarsimavoq, ilaatigut Qeqertarsuup Tunuani sukkanniutitsitsisarnernik.
Uummannamut 1985-imi uterpoq Avannaata Qimussersualu 1989-imi siullerpaamik ingerlanneqartoq aallarnerlugu.