Avannaata Qimussersuani Iluliarmiut Uummannarmiullu pitsaanerpaapput

Avannaata Qimussersuani sukkaniunnermi, Qeqertarsuami pisumi, Iluliarmiut Uummarmannarmiullu pitsaanerpaapput. Arfinillit siulliit tikittut illoqarfinni taakkunanngaaneersuupput.
Allattoq Apollo Jeremiassen
marsip 27-at 2010 14:27

Iluliarmiu Jørgen Kristensen apuuteqqaartuuvoq, tassalu Kalaallit Nunaanni qimussimik sukkaniunnermi pissartanngorluni.

Kuuno Markussen, aamma Iluliarmiu normu 2-nngorpoq, Uummannarmiu Hans II Petersen normu 3-nngorluni.

Unnugu nerersuaqatigiinnermi, Qeqertarsuup timersortarfiani pisussami, qimmiginnerpaatut toqqaasoqartussaavoq, taamaaliortoqartarneralu aatsaat siulermeersumik pisussaavoq, tassa uumasut nakorsaata unammersuartunit qimmiginnerpaaq toqqassammagu. Inuussutissarsiiornermut aamma Aatsitassanut Naalakkersuisup, aamma nersutit nakorsaqarneranut akisussaasuusup, Ove Karl Berthelsenip taamatut toqqaasalerneq siunnersuutigaa.

Uumasut nakorsaata toqqassavaa kina akissarsitinneqassanersoq, qimmiginnerpaatut toqqagaanerup saniatigut aningaasat 3.000 koruunit akissarsissutigineqassapput. Taamaaliortoqartalernerata siunertaraa uumasut ajunngitsumik pineqartarnissaasa eqqumaffigineqalernerunissaa.

Avannaata Qimussersuani 2010-mi sukkaniunnermi peqataapput qimussit 33-it.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq