Avannaata Qimussersua pissanngatiginerqarpoq

Avannaata qimussersuaqarnissaanut atatillugu akissaqannginneq pissutaalluni qimuttoqarfiit tamarmik peqataasinnaanngikkaluartut, unamminissaq avannaani pissanngatigineqaqaaq, ajugaasinnaasutullu ilimagisat taagorneqartalereerlutik.

Avannaata Qimussersuaqartarnerani, ukiuni kingullerni marlunni ajugaasartoq, Uummannap kommuneaneersoq Thomas Thygesen, ajugaasinnaasutut ilimagineqartut ilagaat, Qasigiannguanilu aaqqissuisuni ataqatigiissaarisoq Ole Madsen ima oqarpoq:

- Oqaatigiuminaatsorujussuuvoq, kisianni tassa oqarsinnaavunga, Uummannap kommuneaneersoq, ukiuni kingullerni marlunni ajugaasarsimasoq, kommunerisamini ajugaasimalluni maanga tikereermat. Aamma Ilulissaneersut ajugaasinnaalluartut tikereerput. Tamarmik pissangatitsipput. Upernavimmeersut aamma tikereerput. Uggornaraluaqaarli Tunumeersut Qaanaameersullu tikissinnaanngimmata.

Silaannaap allanngoriartornera aamma Qasigiannguani malugineqarpoq.

- Maani aputeqanngilooratta, qujanartumilli apigami qimussit aqqutissaat ajunngilluinnarpoq, taama oqarpoq, Avannaata qimussersuaqarnissaanut aaqqissuisuni ataqatigiissaarisuusoq, Ole Madsen.

Inuussutissaqarnermut, Nunalerinermut Suliffeqarnermullu Naalakkersuisoq Sivert K. Heilmann, Avannaata Qimussersuanut malinnaasussaagaluarluni, pingaarutilinnik allanik pisassaqalerluni ullumi Qasigiannguaniit aallassaaq.