Avannaata Qimussersua pingaarutilimmik aningaasaliisutaarpoq

Air Greenland aamma Kalaallit Nunaanni Qimussertartut kattuffiat aningaasaliinissamik isumaqatigiissuteqarput. Qimussertartut Tunumeersut Qaanaameersullu Avannaata Qimussersuani peqataanissaminnut maanna periarfissaqalerput.
Allattoq Noah Mølgaard, Simon Uldum
januaarip 23-at 2013 12:36

Avannaata Qimussersua, ukiunik 25-nngortorsiortoq, pitsaalluinnartumik isumaqatigiissusiorpoq. Tamanna Ilulissani ullumi pivoq, Air Greenlandimut aningaasaliinissamik isumaqatigiissut atsiorneqarluni.

Air Greenlandip timmisartui suluusallit Avannaata Qimussersuani, Ilulissani marsip 23-iani ingerlanneqartussami, peqataasut amerlassusissaannik aalajangiisuusinnaavoq. Peqataasussat imaata sikuatigut qimusserlutik illoqarfimmut sukkaniuuffissamukartarput. Ukiunili kingullerni sumiiffinni arlalinni siku qajannarpallaartarsimavoq.

- Uummannap sullua assersuutigisinnaavarput. Taannami maanna sikuunngilaq, qimussertartut kattuffianni KNQK-mi siulittaasoq Mikkel Jeremiassen KNR.gl-imut oqarpoq.

Aningaasaliinissamik isumaqatigiissuteqartoqarneratigut timmisartukkut assartuinermi akikillisaavigineqarnissaq qulakkeerneqarpoq. Qaanaamit Tunumillu peqataasussat taamaasillutik sukkaniuunnersuarmut peqataanissamut periarfissaqalerput. Upernavimmi ukiut arlallit matuma siorna sukkaniuuttoqarmat Qaanaamit ataasiakkaanik peqataasoqarpoq. Taakkuli tassaasimapput piniartut Qimusseriarsuup kujataatungaanut piniariarnertik iluatsillugu peqataasut.

Tunumiut aamma ataasiarlutik peqataatitaqarsimapput, maannalu assartuinissamut akikillisaavigineqarnissamik aaqqissuussineq atorsinnaanngorpaat.

- Aningaasaliinissamik isumaqatigiissut, tamakkiisumik atorutsigu, 400.000 koruuninik naleqarnissaa naatsorsuutigaarput, Mikkel Jeremiassen oqarpoq.

Air Greenland siornatigut peqataasussanik assartuinermut aningaasaliisarsimavoq, maannali isumaqatigiissutaasutut annertutiginngitsunik.

- Air Greenlandip qimussimik sukkaniuunnerit ukiut ingerlanerini tapersersortarpai. Sukkaniuunneq pingaaruteqartupilussuuvoq kulturitsinnullu atalluinnartuulluni, tapersersorsinnaaneralu nuannaarutigaarput, attartortitsinermut pisortaq Peter Frederik Lyberth, Air Greenland sinnerlugu isumaqatigiissummik atsiortuusoq oqarpoq.

Air Greenland aamma angutit meeqqallu sukkaniuunnerini ajugaasunut pokalinik ingerlaartitanik tunniussisarpoq.

Aamma atuaruk