Avannaata Kommuniata borgmesteria: Amerlasuut pinnagit avatangiisilerisunilli takornariaqarusuppugut
Ilulissat takornarianit ukiumut ikinnerpaamik 20.000-inik tikinneqartarpoq. Amerlanerunissaat angunianngikkitsik, Avannaata Kommuniani Palle Jerimiassen oqarpoq.
- Islandikkutut suna tamaat ulikkaarlugu takornariaqarneq, taanna orniginngilarput, borgmesteri oqarpoq.
Tassami Islandimut takornariat 2019-imi 2 millionit missaaniipput. Avannaata Kommunianili allaanerusumik anguniagaqarput.
- Avatangiisitta kusanassusaa immikkuullarissusaa takornariamut immikkut malugitinneqarnissaa, takornariat qaleriissaatsinnagit, aammalu kivitsisinnaassutsitta qaanginnginnissaa pingaartipparput. Palle Jerimiassen oqarpoq.
Avatangiiseq aallaavigalugu
- Økoturisme orniginerpaavarput, tassa aqutaasumik avatangiiseq aallaavigalugu imminut akilersinnaasumik takornariartitsineq ingerlatissallutigu.
Tassa takornariat amerlasoorujussuunngikkaluartutlutik avatangiisimik illersuiutigaluni takornariartassasut, Avannaata Kommuniani anguniarneqarpoq.
Killeqanngitsumik takornariartitsineq ingerlanneqalissappat inuiaqatigiinnut qanoq iluaqutaasinnaanera apeqquserneqarsinnaasoq, borgmesteri oqarpoq.
- Soorlu siorna maani Ilulissani takuarput umiarsuit pingasut ataatsikkut tikikkamik, ataaseq 3000-it sinnerlugit ilaasulik sanianiittullu 1000-inik aamma ilaasoqarlutik. Inuiaqatigiittut takuarput taama amerlatigisut ataatsikkut tikikkaangata kivissinnaanatigu.
Tikittut ullormut 300-jut
Ilulissani mittarfissuassaq naammassippat ilaasut toqqaannaq Ilulissiarsinnaasut ullormut 300-it missaanissapput - ullormullu aallartussat aamma 300-uussallutik.
Taakkunani immikkuullarissumik Qeqertarsuup Tunuanut avannarpasinnerusumulluunniit misigisassarsiorsinnaasariaqartut borgmesteri isumaqarpoq:
- Immaqa amerlanerpaat maaniiginnassapput, kisianni immikkut misigisaqarusuttut aamma periarfissinneqassapput avannarparsinnerusumut aammalu maani Qeqertarsuup Tunuani assigiinngitsunik misigisassarsiussallutik.
Mittarfissuassat 2023-imi naammassineqarnissaat naatsorsuutigineqarpoq.
Avannaata Kommuuniani takornarialerinermut periusissiassaq kommunalbestyrelsip siorna septembarip arfineq pingajuanni ataatsimiinnermi inaarutaasumik suliarigamiuk akuerinngilaa.
- Piumaneqarami innuttaasut akuutinneqarnerunissaanut imaqarnerussasoq taavalu aamma piffinni assigiinngitsuni kivitsisinnaassut suliaqarsinnaasullu qulaajarneqarnissaat periarfissallu qulaajarneqarnissaat ersarinnerusumik pilersaarummi ilaatinneqassasut,
