Avannaata Kommunia illoqarfiup ineriartortinnissaanut ingerlatseqatigiiffiliortoq
Ingerlatseqatigiiffiup inissianik, illuutinik aningaasaliiffigisassatullu suliniutinik ineriartortitsinissaq, sanaartornissaq, piginnittuunissaq ingerlataqarnissarlu suliarineqartussanngorlutik.
Tamanna kommunalbestyrelsimi ilaasortat septembarip arfineq-pingajuanni ataatsimiinnerminni isumaqatigiillutik akuersissutigalugu nalunaarutigaat.
Ingerlatseqatigiiffik Avannaata Development A/S taamaasilluni oktobarip aallaqqaataani pilersinneqarpat, pisortaqarfiit suliffeqarfiillu namminersortut suleqatigiinnerisigut illoqarfinnik ineriartortitsinissamik pilersaarusiornerit piareersarneqalissapput.
Suliaq sivisuumik pilersaarusiugaasoq borgmester Palle Jeremiassian oqarpoq. pisortassamillu atorfinitsitsisoqangajalernerarlugu.
Avannaata Development A/S-imik piginneqatigiit aningaasaliissutaat 5 milliuunit koruuniupput.
Ingerlatseqatigiiffiup Avannaata Kommuniata illuutaanik ingerlatsisuulersinnaanera nalilersorneqassaaq. Illoqarfinnillu ineriartortitsinissamik Avannaata Kommuniata pilersaarusiaanik piviusunngortitsinissaq aningaasalersorneqarnissaalu siunnersuusiorfigineqassaaq.
Illoqarfiup ineriartornissaanut suliniut assigusoq Kommuneqarfik Sermersuup 2017-imi aamma saqqummiunnikuuaa: Siorarsiorfik - Nuuk City Development. Nuup qeqqani nutaamik atuarfiliornissaq taakku suliniutaannut ilaalluni.