Avannaarsuani imaq 2013-mi sikuersimassaaq
Silap allanngoriartorneranik misissuinerni siusinnerusukkut naatsorsuutigisartakkaniit naleqqiullugu, siulittuummi uani sikup aakkiartornera sukkanerussagatinneqarpoq, maannamullu siulittuutaasartuni neriunnannginnerpaalluni.
Vincent nangippoq, immap sikua ukiuni kingullerni tallimani ilisimatuut siulittuinerinit sukkanerusumik aakkiartorsimasoq.
Ilisimatuut 2004-mit siulittuutigaat, immap sikua 2100-mi nungussimassasoq, maannali ilimagineqalerpoq, imaq 2013-mi aasakkut sikoqartarunnaassasoq. Tassami issittup kiatsikkiartornera nunarsuarmi allanut naleqqiullugu marloriaammik sukkaneruvoq.
Tamanna eqquussimappat, issittumit inuusunut tamanna sakkortuumik kinguneqassaaq. Tassami tamaani umiarsuaqarnerulissaaq aammalu uuliamik gassimillu ujarlerneq qalluinerlu annerulissapput.
Avannaa pillugu ilisimatusarfimmiut paasissutissanik katersillutik ukiuni kingullerni qulini Ward Hunt Islandimiipput, sikullu ukiuni kingullerni aakkiartupiloornera tupaallaatigeqaat.
- Ward Hunt Island-imi aasakkut kiassusia agguaqatigiisillugu 5 gradiusaraluarpoq, aasarli kingulleq 20 gradiuvoq, taamaammallu siku aalertoqaaq, pisortaq, Warnick Vincent, Canadap oqarpoq.
