Avannaani umiarsuarmik angallassisarnissaq itigartinneqarpoq
Umiarsuarmik ilaasortaammik, 85-inik ilaasoqarsinnaasumik, Qeqertarsuup Tunuaniit Uummannamut Upernavimmullu angalasartussamik pisiniarnerigaluaq Namminersornerullutik Oqartussanit itigartinneqarpoq.
Illoqarfiit taakku marluk avannaaniittut umiarsuarmit Disko Line-mit tikinneqartalissanersut, Naalakkersuisut akissutissaannut innuttaasut assut pissanngasimapput.
Maannalu tassa akineqarput – Ole Dorph – Disko Line-mi pisortaaneq, aperaarput itigartitaanertik qanoq qisuariarfigineraa, akivorlu:
- Soorunalimi uanga tamanna uggorinngitsuunngilara, aamma uggornaqaaq qitiusuminngaanniit, tassa naalakkersuinermik suliaqartut una suliassaq neqerooruterpullu itigartimmassuk, taamaattumik isumaqarpunga uggornartoq, neriuutigissavara paatsuuinermik aallaaveqartumik itigartinneqartoq. Suli periarfissaqarput allanngorteriarnissaanut, maannakkut tassa aalajangiussimaffiginiarneqarpoq aalajangersimaneq kukkusoq pisoqarlu, tassa angallannerup aningaasarpassuarnik sipaarfiginiarnerata tungaatigut. Tamatuma malitsigivaa inuppassuit avannaamiut, minnerunngitsumillu Nuussuup avannaani najugaqartut, massakkut tassa qanoq ilioriarsinnaanatik uninngaannarput, soorlumi tigusaaqqaasutut inissisimasut. Silarsuarput massakkut milliartuinnartoq, minnerunngitsumillu aamma kommunit kattussuuttussat, angalanissamullu aamma pisariaqartitsitsineq taamaa annertutigigaluartoq, tassa nunatsinni ullumikkut inuit 1000-tillit arlallit tigusaaqqasutut inissisimapput, isumaqarpungalu uagut nunaqqatitta taama atugassaqartinnissaat akisussaaffigisussaanngikkaluaripput, Ole Dorph oqarpoq, nangillunilu:
- Allaffissornikkut aammalu naalakkersuisoqarfiup aalajangigaa, isumaqarpunga naalakkersuisuninngaaniit aamma politikerininngaaniit susassaqartuninngaaniit massakkut qisuariarfigineqartariaqartoq, uagut suliassarput naammassivarput, kisianni uagut pinngitsaalisinnaanngilagut, tassalu politikerit massakkut nikussaartariaqalerput ajornartorsiullu massakkut periarfissaqarallarnerani aaqqinniarsariniarlugu isumaqarpunga tassa massakkut taamaaliornissaminnut ullualunnguanik suli periarfissaqartut, Ole Dorph naggasiivoq.
