Avannaani Siumut Atassullu avissaartuupput
Qaasuitsup Kommunissaani Ikaarsaariarnermut Ataatsimiititaliami Siumup Atassutillu suleqatigiinnerat taamaatinneqarpoq. Palle Jeremiassen Siumumeersoq taama nalunaaruteqarpoq.
Allattoq Mads Lynge
Palle Jeremiassen imatut tunngavilersuuteqarpoq:
- Qaasuitsup Kommuniani suliassaq taama annertutigisoq Atassummiit tamakkiisumik suliarineqanngitsutut misigisimavugut, Ikaarsaariarnermullu Ataatsimiititaliami Atassutip ilaasortaatitaasa ilaat suli peqataanngillat, assigiinngitsunillu aaqqiiniarluta Atassummut saaffiginnittaraluarluta aaqqiissutissanik siunnersuuteqarneq ajormata taanna tunngavigalugu suleqatigiinnerput kipivarput, Qaasuitsup Kommunissaani Ikaarsaariarnermut Ataatsimiititaliami ilaasortaq Palle Jeremiassen, Siumumeersoq oqarpoq.