Avannaani siuarsaanissaq Nuummi mittarfiup tallinissaanit pingaarnerusoraa
Qaasuitsup Kommuneani siuarsaanissamut periarfissaasut Naalakkersuisunit qimerloorneqarluaqqullugit borgmesterip ilaatigut oqaatigaa. Aammalu siunnersuutigalugu Assartuussineq pillugu isumalioqatigiissitap innersuussutaa, Imarpik qulaallugu Nuummi timmisartunut mittarfeqalernissaa taamaatiteqqullugu.
Takornariaqarneq eqqarsaatigalugu Ilulissat tamassumunnga siuttuuvoq. Tassalu inuiaqatigiit aningaasaqarnerannut tapertaalluartuulluni. Tamannarpiarlu tunngavigalugu Ilulissani timmisartunut mittarfiup taamaallaat 1199 meterimut tallineqarnissaa Qaasuitsup Kommuneata isumaqatiginagu.
Assartuussineq pillugu Isumalioqatigiissitap innersuussutigaa Imarpik qulaallugu timmisartuussinermi Nuuk mittarfeqalissasoq.
- Kikkut Nuummut Nuummiillu timmisartornerusarpat? Tassa Namminersorlutik Oqartussani sulisut, taakkuinnaanerullutillu, Jess Svane allaakkani ammasuni ilaatigut allappoq. Allakkamini taavaa Ilulissani timmisartunut mittarfik 1799 meterimut tallineqarpat takornariat amerlanerit tikittalertussaassasut.
- Takornariat aningaasaaterpassuaqarlutik tikittarput. Taamaattumik taakku nunanit allanit Kalaallit Nunaannut aqqut akileeqataaffigisinnaavaat, Jess Svane allappoq.
Qaanaami mittarfiup matuneqarnissaa borgmesterip aamma akerleraa aammalu, Nuummi containerinut umiarsuaviliornissamut taarsiullugit, Ilulissani, Uummannami Upernavimmilu umiarsualiviit allaneqarnissaat kissaatigalugu.
