Avannaani politikeri: Kanngusuppunga
- Illaruaatigineqartutut misigisimavunga, ajornerpaavorli misigisimagama Qaasuitsup Kommuneani innuttaasut illaruaatigineqartut, Ane Lone Bagger tusagassiutinut nalunaarummini ilaatigut taama allappoq.
Qisuariarneq pivoq, Avannaani kommunip aningaasatigut ajornartorsioqisup, ippassaq kommunalbestyrelsemi ataatsimiinnissaagaluaq kinguartimmassuk. Tamanna pivoq Borgmester Jess Svanep telefonikkut ataatsimeeqataanermini kinguartitsequsinera naapertorlugu, aatsaallu ataatsimiinnissaq pissasoq sulinngiffeqareernermi kingorna uteruni, tassalu sapaatip akunnerata tulliani.
- Cirkusimit takutitsineq naggaserneqarpoq, ataatsimiinnissap kinguartinneranik, aatsaallu ataatsimiittoqassalluni borgmesteri nammineq suliassani paarilerpagit. Tallimanngornermi septemberip qulingani ersersinneqarpoq, sooq oqaaseq 'politikeriunerlunneq' atorneqalersimammat. Tamanna kanngusuutigeqaara, Ane Lone Bagger naqissusiivoq.
Aningaasat 257.000 koruunit atorlugit kommunalbestyrelse Ilulissani ataatsimiitinneqariaraluarpoq. Ataatsimiinnissaq qangali pilersaarutaavoq, aammalu aningaasartuutikillisaanermik kinguneqartussaagaluarluni.
Tamanna pillugu Jess Svane ullumi oqaaseqartinniaraluaratsigu iluatsissimanngilarput.
