Avannaani nutaanik sanaartugassaqalissagunarput

Nutartigaq 18:45i/>

Sanaartugassanut aningaasaliissutinik immikkoortitereqqinnermi illoqarfiit Qasigiannguit aamma Qeqertarsuaq 2011-mi sanaartorfigineqarnissaminnut aningaasaliiffigineqarput, Uummannamilu Atuarfik Edvard Krusep qaliaata oqullip aserfallatsaalineqarnissaanut aningaasaliisoqarluni.

Qaasuitsup Kommuniani kommunalbestyrelsep 2011-mi sanaartugassanut aningaasaliissutit siorna ukiup naalluinnarnerani akuersissutigimmagit, Qasigiannguit aamma Qeqertarsuaq sanaartugassanut nutaanut aningaasaliiffigineqanngikkaluarput.

Naalakkersuisulli Ilulissani inissianut nutaanut 24-nut sananeqartussanut tamakkiisumik aningaasaliinissaminnut neriorsuuteqareersullu, illoqarfiit taakkua marluk 2011-mi sanaartugassanut aningaasaliiffigineqarput, kommunalbestyrelsemmi aningaasat 8 millioni koruunit Ilulissani inissialiornissamut immikkoortikkaluarsimammagit:

- Kisianni tassa taakkua Namminersorlutik Oqartussat massakkumuugallartoq neriorsuutiginikuuaat tamakkiisumik aningaasaliiffigissallugit, Sanaartugassanut avatangiisinullu ingerlatsivimmi pisortaq, Nick Nielsen, oqarpoq.

Nicks Nielsenip erseqqissaatigaa Namminersorlutik Oqartussat neriorsuereeraluarlutik suli aningaasaliinissamik akuersissuteqanngimmata.

Sanaartugassanut nutaanut tulleriiaarinermi Qasigiannguani Kalaalimineerniarfiup iluarsaanneqarnissaa 675.000 koruuninik immikkoortitsiffigineqarpoq aammalu eqqakkanik ulorianartunik tigooraasarfiliornissaq 800.000 koruuninik aningaasaliiffigineqarluni. Qeqertarsuarmi eqqaavissuup nuunneqarnissaa 1.150.000 koruuninik aningaasaliiffigineqarpoq, taassumalu saniatigut aamma Qatserisartoqarfiup aserfallatsaalineqarnissaanut 300.000 koruunit aningaasaliissutigineqarlutik. Uummannami Atuarfik Edvard Kruse-p qaliata oqullip iluarsaannissaanut 3.300.000 koruunit immikkoortinneqartut.

Sanaartugassanut pisortap Nick Nielsen-ip erseqqissaatigaa sanaartugassanut nutaanut aningaasaliinermi, Ilulissani inissialiassanut 24-nut Namminersorlutik Oqartussat tamakkiisumik aningaasaliinissaat tunngaviulluinnartoq.