Avannaani isumasiuisitsinissaq piareersarpaat
Aalisarnermut naalakkersuisoqarfimmiut qanittukkut ataatsimiititsisaqattaarnerminni oqaatigaat Qaasuitsup Kommuniani qaleralinniat 276-inik ikilisaavigineqartariaqartut, taamaasiornissarli Edvardt Kristiansenip ilimaginngilaa:
- Ukua 276-it qaqitiinnarnissaat uanga naatsorsuutiginngilara, soorunalimi aalisakkat taamatut oqareernittuut annertutigisut piniarneqanngitsut inuutissarsiutigineqarsinnaasut taakkua kommunimi uanga aqqutissiutigerusuppakka, Edvardt Kristiansen oqarpoq.
Naak, imaaliallaannaq atorfiit piniagassallu allat piorsaaviginissaasa ullormiit ullormut pisinnaanissaa ajornakusuussagaluartoq Qaasuitsup Kommuniani inuutissarsiornermut ataatsimiitsitaliami siulittaasup naalakkersuisut aaqqiinissaat suliffissanillu pilersitsinissaat kissaatiginerarpaa.
Imaanilu inuutissarsiutillit septembarip 30-aniit oktobarip pingajuata tungaanut isumasioqatigiisinneqarnissaat neriunartoqartinnerarpaa, inuutissarsiutinik nutaanik pilersitsinissaq tassani aqqutissiorneqarumaartoq naatsorsuutigigamiuk.
- Iluaqutaasussaavoq tikkuussisussaassagami inuiaqatigiinni qanoq’una ingerlariaqqinniartugut, Avannaa, Qaasuitsup Kommunia isigalugu, aammalu inuiaqatigiinni pilersuisinnaanerput qanoq nalilersussavarput, imaluunniit nalilersortussaavarput tassani taavalu avammut niivernermi niiverutigisinnaasat taakkua aamma nalilersugassaassapput. Isumasioqatigiisitsinissamullu aningaasat millionit missaat atorneqartussaasut Qaasuitsup Kommuniani inuutissarsiornermut ataatsimiitsitaliami siulittaasup Edvardt Kristiansenip oqaatigaa.
