Avannaani Ilinniarnertuunngorniat tallimat inissaarupput

Aasianni Avannaani Ilinniarnertuunngorniarfimmi ilinniartut tallimat inissaarupput.Sapaatip akunnerata naanerani nipilersortartut Aasianni tusarnaartitsinissaanni Nipiaa rockfestivaleqarnissaani nipilersortartut inissaqartinneqartussaammata, GU-mi ilinniartut tallimat inissaarupput.
Allattoq Jaaku Lyberth
septembarip 02-at 2009 13:19

Avannaani ilinniarnertuunngorniarfimmi, ilinniartut maannakkut 365-iusut tamarmik inissaqartinneqanngillat. Ilinniartut 19-it inissaminnik utaqqipput, taakkualu ilaat tallimat Aasianni akunnittarfimmi sømandshjemme-milu inissinneqarallartut, aqagu sisamanngornermi aneqquneqarput, sumullu inissinneqarallarnissaat suli paasineqarani.

Avannaani ilinniarnertuunngorniarfik ilinniartut inissinneqarallarnissaannik suliniuteqarpoq.

Ilinniartut tamaasa inissaqartinniarlugit Avannaani ilinniarnertuunngorniarfimmi ilinniartitsisut inissaralui, ilinniagaqartunut inissiatut atorneqarallarput, taamatullu Aasianni illuinnaat, inissiat unnuisarfiillu ilinniartunut inigitinneqarput.

Aasianni ilinniarnertuunngorniarfimmi ilinniartut maannakkut atuarnerup aallartinneqarnerani 365-iupput, atsaallugooq taamak amerlatigisut ilinniartuutigineqarlutik.

Ilinniartut inissaqartinniarlugit inissiaatileqatigiiffik A/S INI, inissiaataatillit, kommunilu saaffigineqartut, Aasianni ilinniarnertuunngorniarfimmi allaffiup pisortaata Tine Jeremiassenip oqaatigaa.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq