Avannaamiut peqqiilliornerusarput

Avannaamiut kujataamiuniit vitamiinisornikinnerusut, napparsimakulanerusartullu nutaamik misissuisoqarmat paasineqarpoq.

Taamaattumik Avannaamiut kujataamiut nereriaasiannik ilinniartariaqarsorineqarput.

- Kalaallit Nunaanni nerisat assigiinngitsorujussuupput. Kujataani, avannaani illoqarfinni nunaqarfinnilu nerisat tamarmik assigiinneq ajorput, issittumi avatangiisit pillugit ilisimatusarfimmi ilisimatooq Bente Deutch oqarpoq.

Kujataamiut siusinnerusukkulli nerisatik allanngorartillugit nerisalersimapput. Avannaamiut suli maannamut nerisatik allanngorartippiarnagit nerisarlutik.

- Naatsumik oqaatigalugu kujataamiut qallunaaminertornerusarput, Bente Deutch oqarpoq nangillunilu:

- Inuit neqitornerusartut napparsimakulanerusarput. Isorliunerusuniittullu peqqinnarnerusunik nerisaqarnissaat anguniarlugu naalakkersuinermik suliaqartut aqqutissiuisinnaapput, soorlu naatitat qerisunngorlugit isorliunerusunut nassiuttarneri tapiiffigisarlugit.

Avannaamiut naatitanik pisinissartik sungiusartariaqassavaat. Sunami tamarmi ilinniarfiummat tamatta sungiusartariaqartarpugut, Bente Deutch naggasiivoq.

Kalaaliminertornerulernissaq inassutiginartinneqanngilaq. Puisit nannulli neqai toqunartoqarpallaarmata naatitanik nerinerulernissaq inassutiginartinneqarneruvoq.