Avammut niuerneq pitsanngoriarpoq

Kalaallit Nunaata avammut niuernera ukioq manna qaammatini pingasuni siullerni pitsanngoriarsimavoq, naak suli amigartooruteqaraluartoq.
Assi © : Branding Greenland
Allattoq Apollo Jeremiassen
juunip 22-at 2011 05:41

Siorna qaammatinut pingasunut siullernut naleqqiullugu 261 millionit koruunit pitsanngoriaataapput ukioq manna taamaallaat amigartoorutaapput 109 millionit koruunit.

Pitsanngoriaateqarneq marlunnik pissuteqarpoq.Nunanit allanit nioqqutissanik tikisitinikunnerulersimavugut, tassa ukioq manna qaammatini siullerni 633 millionit koruunit naliginut nioqqutissanik tikisitsisimalluta siornamut naleqqiullugu 78 millionit koruuninik ikinnerusunik.

Tamatuma ilutigisaanik nunanut allanut tunisinerusimavugut iluanaarutigalutigut qaffassimallutik 183 millionit koruuniit 524 millionit koruuninut, procentinngorlugu 53,5 procenti.

Nunanut allanut tuniniakkavut tassaanerupput aalisakkat. Taakkulu piffissap kingulliup ingerlanerani, siornamut taamaalineranut naleqqiullugit, nunarsuatsinni akii pitsanngoriarsimallutik. Raajat kisiisa eqqarsaatigaanni taakkuninnga 167 millionit koruunit naliginut nunanut allanut tunisaqarsimavugut.

Nunanit allanit nioqqutissanik eqqussuinitsinnut tunngatillugu ikummatissanik eqqussuinerput annikinnerulersimavoq, gasolie aamma ikummatissat allat eqqarsaaatigalugit siornamut naleqqiullugu 78 millionit koruuninit taakkuninnga atuinerput appariarsimavoq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq