Avaleraasartuunik pisassiissutit isumaqatigiinniutigineqarneri ajalusoortut

Isumaqatigiinniarnerit Skotlandip illoqarfiisa pingaarnersaanni Edinburghimi ingerlanneqarput, isumaqatigiittoqarnissaalu anguniarlugu ullormik ataatsimik sivitsorneqaraluarlutik. Illuatungeriilli EU, Norge, Rusland, Island, Savalimmiut aamma Kalaallit Nunaat ulluni pingasuni isumaqatigiinniareerlutik isumaqatigiissuteqaratik avissaaginnarput. Fiskeritidende taama allaaserisaqarpoq.

Pingaartumik Island Savalimmiullu avaleraasartuutinik amerlanerusunik pisasissinneqarnissartik ilungersuutigaat, isumaqaramik avaleraasartuut ima nikissimatigisut tamanna pisassiissutinik agguaanermi ilanngullugu isumaliutigineqartariaqartoq. Savalimmiormiut avaleraasartuunik ammassassuarnillu aalisartui EU-p umiarsualiviinut aggustip qaammataanili mattussaapput, isumaqatigiissutigineqartut malillugit ammassassuarnik pisassiissutaasut pingasoriaataannik avaleraasartuunillu pisassiissutit sisamariaataannik pisaqarsimanertik pissutigalugu.

Isumaqatigiinniarnerit iluatsinngitsoornerinut suna pissutaanersoq ilisimaneqanngilaq, norgemikli avataasiorlutik aalisartut kattuffiata Fiskebåtip EU Islandilu pisuutippai, taakku nammineq imartaminni kalaallillu avaleraasartuunik aalisarnerannut peqataanissaminnik kissaateqarmata.

- Isumaqatigiinniarnerit iluatsinngitsoornerinut pissutaasoq tassaavoq Islandip EU-llu Kalaallit Nunaata avaleraasartuunik pisassiissutissatut aalajangersagaanik 100.000 tonsiusunik aalisannginnissamik imminnutg pisussaaffilerusunnginnerat, pisortaq Audun Maråk oqarpoq.

Norgemi aalisarneq pillugu aviisi Fiskaren naapertorlugu, EU aamma Kalaallit Nunaat isumaqatigiinniarnerit suli aallartinneqanngitsut isertuussamik isumaqatigiissimapput EU-p Kalaallit Nunaata avaleraasartuutinik pisassiissutaata affai pissagai, taarsiullugulu Kalaallit Nunaat EU-mit aningaasaliissutinik tunineqassasoq.

Allaffimmi pisortap Emanuel Rosingip, susassaqarfimmi tassani sullissisuusup, tamanna eqqortuunnginnerarpaa. EU-p nunattalu akornanni isumaqatigiissutit pioreersut innersuussutigai, taakkulu saniatigut isertuussamik isumaqatigiissuteqartoqrsimanera ilumuunnginnerarlugu.

EU-lli Norge pisuutippaa. Norge EU-kommissionip naaperiaasitsilluni siunnersuutaanik itigartitsisuuvoq, Island Savalimmiullu akuersisut, aalisarneq pillugu kommissæri Maria Damanaki, ataatsimiinnermik aqutsisuusoq oqarpoq.

- Periarfissatsialassuaq annaaneqarpoq, Grækenlandip EU-kommissæri nittartakkamini taama allassimasoq, Fagpressen.eu taama allaaserisaqarpoq.

Savalimmiut aalisarnermut ministeriata Jakob Vestergaardip oqaatigaa Savalimmiut tamatumuuna pisuussuteqanngitsut. Neqeroorutigineqartoq Savalimmiunut neqeroorutigineqartumut assingusoq, Kringvarpimut oqaatigaa.

Norge EU-lu avaleraasartuunik pisassiissutit pillugu isumaqatigiinniaqqilerput, isumaqatigiinniarnerillu ullumi aallartinneqassapput.