Avaleraasartoortassiinermi assigiinngitsumik suleriaaseqarneq GE-p isornartorsiorpaa

Pisortat sanaartortitsinissamut suliariumannittussarsiuussineranni, sanaartortitsinissamut neqerooruteqartut pisortanut akiitsoqarnertik nalunaarutigisussaagaat, Namminersorlutik Oqartussanik piumasarineqartarpoq.

Aalisarnermut naalakkersuisoqarfimmi avaleraasartoortassanik agguaassinermi pisortanut akiitsoqarnermik nalunaaruteqarnissamik piumasaqaateqarneq atortinneqanngilaq. Piginneqatigiiffiit qinnuteqartut pisortanut akiitsoqarnertik nalunaarutigissanngilaat. Tamannalu kukkunersiusarfiup Deloittep ingerlatsinermut kukkunersiuinerani uparuarneqarpoq.

Assigiinngitsumik periuseqarneq sulisitsisut peqatigiiffiannit GE-mit eqqumiigineqarpoq. 

Assersuutigalugu pisortat sanaartortitsinissamut suliariumannittussarsiuussineranni erseqqissumik naleqquttumillu piumasarineqartarpoq neqerooruteqartut akileraarutinut pisortanullu akiitsoqassanngitsut.

-Periuserineqartoq taamatut ittoq aalisagartassiinermi pissusissamisoortuusoq atuuttariaqaraluartorlu Sulisitsisut Peqatigiiffiannit GE-mit isumaqarpugut.

Isumaqarpugut taamatut iliorneq piginneqatigiiffinnut inuiaqatigiinnilu innuttaasunut assigiinngisitsinerusoq, Brian Buus Pedersen GE-mi pisortaq oqarpoq.

Avaleraasartuut agguaanneqarneranni pisortanut akiitsoqarneq pingaartinneqanngilaq, minnerunngitsumik piginneqatigiiffimmut KNT-mut tunngasoq, taanna aalisarnermut naalakkersuisumit piginneqataaffigineqarsimavoq taannalu pisortanut akiitsoqarpoq.

KNT-ip akileraartarnermut akiitsui 1,2 million koruuniupput taakkua avaleraasartuunik agguaassinermi sunniuteqanngillat. Piginneqatigiiffik KNT 4.285 tonsinik avaleraasartassinneqarmat.

Aamma atuaruk Juullimili akissarsipput kommunimiillu ikiorneqarsinnaanngillat

Aalisagartassiinermi piumasaqaatigineqartut erseqqissarneqarsimannginnerat Deloittemit isornartoqarsiorneqarput.

Taama inerniliineq sulisitsisut peqatigiiffiata GE-p pisortaanit tapersersorneqarpoq.

- Isumaqarpunga isornartorsiuineq sakkortusoq.

Taamatut isornartorsiuineq ingerlatsivimmit nassuiarneqartariaqarpoq.

Ingerlatsiviup suleriaasia siunissami paasiuminarnerulissammat.

- Nalunaarusiami atuarneqarsinnaavoq, naalakkersuisoq Karl-Kristian Kruse aalisagartassiinermi sunniuteqarniarsimaneranik takussutissaqanngitsoq.

Aammattaaq atuarneqarsinnaavoq, aalisarnermut naalakkersuisoq qinnuteqaatip suliarineqarnerani attuumassuteqarnera pillugu oqallisigineqarsimannginneranik naalakkersuisoqarfimmit nalunaarutigineqarluartoq,  kukkunersiuisarfimmit Deloittemit tamassuma uppernarsarneqarnissaanut takussutissanik pissarsinissaq ajornakusoorsimavoq.

Takussutissanik uppernarsaatinik amigaateqarneq kukkunersiuisarfimmut Deloittemut ajornartorsiutaasussaanngikkaluarpoq taama pingaaruteqartigisumut, GE isumaqarpoq.

- Aalisagartassiissutit ingerlatsivianni taama pingaaruteqartigisumi sulianut attuumassuteqarnermut apeqqutit aamma ilaapput, GE isornartorsiuivoq.

- Ingerlatsivik taama ittoq nalunaarusiortariaqaraluarpoq pingaaruteqarluinnartumik naalakkersuisuminik oqaluuserisaqarsimatillutik, sulisitsisut peqatigiiffianni GE-mi pisortaq Brian Buus Pedersen.