Avaleraasartuunik aalisarneq aamma tunfiskinik pisaqarfiuvoq
Royal Greenland nittartakkamini taama allaaserisaqarpoq.
- Aatsaat siullerpaamik tunfiskinik takuvunga, assut angeqalutillu alutornarluinnarput. Pisarisatsinni anginerpaaq 260 kiiluuvoq, meterinillu 2,56-inik takissuseqarluni, Tuugaalimmi inuttat ilaat, Kristian Iversen, oqaluttuarpoq.
AAMMA ATUARUK Tunumi avaleraasartuut tunfiskeqalersitsipput
Royal Greenlandip aalisariutai pingasut Tunup imartaani aveleraasartoorniarnerminni tuninik katillugit 21-nik pisaqarput.
Kilisaat Tuugaalik aggustip 27-ani 17-inik pisaqarpoq, Tasermiut aggustip 24-ani pingasunik pisaqarpoq, taamatuttaaq kilisaat Tuneq tunfiskimik ataatsimik ullormi tassani pisaqarpoq.
Tunfiskit kingusinnerusukkut tuniniagassanngorlugit lastimi nillataartumut inissinneqarput.
Tunfiskit tungujortumik avaleraasallit piumaneqartorujussuupput, Japanimilu kilomut akigitinneqartup 45.000 kr-it tikissinnaasarpaa.