Avaleraasartoorniarnermut GA sakkortuumik isornartorsiuivoq

Atlantikup Avannaani avaleraasartoorniarnermut EU-p, Norge-p Savalimmiormiullu isumaqatigiissutaannut, ukiunilu tallimani atuuttussamut, Kalaallit Nunaanni Sulisitsisut peqatigiiffiat, GA sakkortuumik isummersorpoq. Taakku Naalakkersuisut Qallunaallu naalakkersuisui, isumaqatigiissummi Kalaallit Nunaannut toqqaannartumik attuumassuteqartut tamaasa peerneqarnissaannik suliniuteqaqquvaat.

GA-p Aalisarnermut Nunanullu aallanut tuniniaanermut ataatsimiititaliaata siulittaasua, Henrik Leth naapertorlugu, nunat qulaani taaneqartut isumaqatigiissutaasa, Kalaallit Nunaata Island-illu isumaqatigiissutaat ajalusoortissinnaavaat. Henrik Leth-ip oqarnera naapertorlugu, avaleraasartoorniarnermi isumaqatigiinngissutit, Kalaallit Nunaannut attuumasunngortinneqartutullusooq maanna inissisimalermata.

- EU-p nunallu allat isumaqatigiissutaat allaanngilaq, Kalaallit Nunaata avaleraasartoorniarnissamut periarfissaannik ajortisaarisut. Aamma nunat tamalaat aalisarnermut politikkii eqqarsaatigalugit taamatullu ileqqorissaarneq aallaavigalugu naliliinerit suusupagineqartutullusooq isikkoqarpoq, EU-p nunallu qulaani pineqartut isumaqatigiissutaat qiviaraanni, Henrik Leth naliliivoq.

Isumaqatigiissummi kalaallit aalisariutaatillit Tunup avannaani misiliilluni avaleraasartoorniarluni aalisariutinik, Norge-mit Savalimmiunit aamma EU-mit attarorsinnaaneri ilaatinneqanngilaq. Tunumi misileraalluni avaleraasartoorniarnermi 100.000 tonsit pisarineqarsinnaagaluarput.

EU-p, Norge-p Savalimmiullu isumaqatigiissutaanni Island aamma ilaatinneqanngilaq. Island-ip aalisarnermut ministeria isumaqarpoq, Norge-p tungaaniit, Tunumi avaleraasartoorniarnermik misiliilluni aalisarsinnaanerit mattunniarsarineqartut, tassami Norge-mit ilisimaneqarmat, Kalaallit Nunaata imartaani avaleraasartuut ukiuni kingullerni amerliartuvinnavimmata.

Maannali tassa apeqqutaaginnalerpoq, qallunaat naalakkersuisuisa EU-llu aalajangiinerinut, Kalaallit Nunaata isumaqatigiinngissutaannik oqariartuutaat iluaqutaassanersut. Tamanna pillugu Henrik Leth ima oqarpoq.

- Taama pissusilersortoqarneranik isumaqarnerput EU-mut Danmarkimullu oqaatigisariaqarparput. EU, Savalimmiut Norgelu isumaqatigisinnaanngikkutigit, qujanartumik allanik nunaqarpoq Kalaallit Nunaannik ikiuisinnaasunik. Taakkulu tassaapput Kinamiut russillu aalisartui. Aalisarneq eqqarsaatigalugu Norge-miunik Savalimmiormiunillu suleqateqarnitsinni eqqumiippoq, taakku aningaasarsiornermik eqqartuisoqalernerani, Kalaallit Nunaat suleqatigerusukkunnaarmassuk, tassa aningaasanik annaasaqarnissartik taakku eqqarsaatiginerummassuk. Kalaallit Nunaanni aalisartut Atlantikup avannaani annersanut maanna ilaalernikuupput, taamaattumik nammineq qanoq iliornissatsinnik EU-mit, Norge-mit Savalimmiunillu ajoqersuunneqartariaqanngikkaluarpugut, GA-p Aalisarnermut Nunanullu aallanut tuniniaanermut ataatsimiititaliaata siulittaasuaHenrik Leth oqarpoq.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat