AVALAK: Aaqqissuusseqqittoqarnera kalaallinut ilinniagaqartunut kingunerlutsitsisinnaavoq
![](/sites/default/files/styles/image_934x467/public/article_images/avalak_skilt_foto_simon_uldum.jpg?itok=-6FOtKcK)
Aaqqissuusseqqinnerup, Fremdriftsreformimik taaneqartup, immikkoortua siulleq Danmarkimi ilinniartoqarfinni siorna aggustip aallaqqaataani atuutilersinneqarpoq.
Aaqqissuusseqqinnermi ilinniagaqartut ilinniakkaminnik sapinngisamik sukkanerpaamik naammassisaqartarnissaat anguniagaavoq, ilinniakkamut piffissaliuunneqartup naammassinnginnerani - sapinngisamillu sukkanerusumik.
Tamannali kalaallinut ilinniagaqartunut arlalinnut ajornartorsiutaasinnaavoq, Avalaap siulittaasua Bjørk Lange Kristensen taama oqarpoq.
- Kalaallit ilinniagaqartut ilinniakkaminnik naammassinninnissaminnut piffissamik sivisunerusumik pisariaqartitsikkajuttarput. Oqaatsit pillugit unammilligassaqarnerunertik imaluunniit Danmarkimi najugaqarluni allaanerusumik inooriaaseqarneq pissutigalugu.
Ilinniakkap naammassineqarnissaanut piffissaliussaq qaammatinik arfinilinnik qaangerlugu naammassigaanni pillaatisiassaq, aaqqissuusseqqinneq naapertorlugu, tassaavoq ilinniagaqarnersiutinik annaasaqarneq.
Aamma sakkortunerusumik pisoqarsinnaavoq, tassalu ilinniagaqartoq ECTS-pointinik piumasaqaatigineqartunik, semesterinut soraarummeernernilu tunniunneqartartunik pissarsisinnaanngippat, tamanna ilinniakkamit anisitaanermik kinguneqarsinnaavoq.
Ilinniagaqarnersiutit annaanneqarsinnaapput ilinniakkamilluunniit anisitaasoqarluni
Tamannalu ilinniagaqartunit danskinit maannalu aamma kalaallinit isornartorsiorneqarpoq:
- Ilinniarneq sukkatsisarneqassaaq, aamma fagimi, immaqa malinnaaffiginiarlugu ajornartorsiuteqarfigisami, ilinniarnerup piffissamik atuiffiginerunissaanut periarfissaqanngilaq. Tamannalu kingunerlutsitsisinnaavoq, soorlu assersuutigalugu ilinniagaqarnersiutit annaanerinik imaluunniit kinguaattooqqavallaarnermi ilinniakkamit anisitaanermik.
Taamaammat peqatigiiffik isumaqarpoq kalaallit ilinniagaqartut oqaatsitigut kulturikkullu ajornartorsiutaasinnaasut pissutigalugit piffissaliussap iluani ilinniakkaminnik naammassinnissinnaanngitsut immikkut akuerisaasariaqartut.
Tamannalu ilaatigut Siumut sinnerlugu Folketingimut qinigassanngortittup Martha Abelsenip KNR TV-kkut qineqqusaarnermi taperserpaa:
- Immikkut akuerineqarnissaq periarfissaasariaqarpoq - oqanngilanga tamanna tamanut atuutissasoq - kisianni ukiup affaani kingullermi imaluunniit ukiumi kingullermi pisariaqartitsisut anisitaassanngikkunik taamatut periarfissaqarsinnaasariaqarput.
Oqallinnermi tassani aamma Aaja Chemnitz Larsenip Inuit Ataqatigiinneersup Rasmus Dalsgaard Andersenillu Demokraatineersup kalaallit ilinniagaqartut aaqqissuusseqqinnermit (Fremdriftsreformimit) eqqugaasinnaasut immikkut akuerineqarnissaannik sulissuteqarusullutik oqaatigaat.
Tamannalu IA-p Siumullu folketingimut maanna ilaasortaatitarisaannit aamma qaqinneqarsimavoq.