Autistertut angerlarsimaffissaat nutaaq
Kommune Kujallermi isumaginninnikkut pisortaq, Mikkel Balle, oqarpoq, angerlarsimaffissap Qaqortumiittup pilersinniarneqarnera siorna 2012-imi januaarimili aallartittoq.
Suliaq aallartinneqarmalli avammut matoqqasunik immikkut ilisimasaqartunik sulisussarsiortoqarpoq. Tamannalu iluatsittoq, Mikkel Balle unnersiorpoq.
- Sulisussanik piukkunnarluinnartunik pissarsivugut, aamma kalaallisut oqaaseqartunik sulisussarsivugut, taakkua avammut matoqqasunik Danmarkimiittunik sullissisuupput, maannalu Kalaallit Nunaanni angerlarsimafimmik nutaamik pilersitsisoqarmat suliaq pissangagalugu Kalaallit Nunaannut uterput, Mikkel Balle oqarpoq.
Sulisut tamarmik ussersorluni oqaloqatiginnittarnermik pikkorissartinneqarput, suliamullu attuumassuteqartunik allanik suliuniuteqartoqarluni.
- Avammummi matoqqasut, tusaaniarnermikkut ajornartorsiuteqartut, immikkut ittumik sullinneqarnissaat pingaaruteqarpoq, inunnik isumaginnermik pisortaq oqarpoq.
Angerlarsimaffik nutarterneqarpoq pisatsersorneqarlunilu, angerlarsimaffimmilu najugaqartussaq siulleq isertereerpoq. Angerlarsimaffik pingasunut inissaqarpoq.
Kommune Kujallermi borgmesterip, Simon Simonsenip, ataatsimiititaliamilu siulittaasup, Kristine Raahaugep, qilerutaasaq aappaluttoq pingasunngorpat nalunaaqutaq marlunut qiussavaat, Qaqortumilu innuttaasunut Kirkegårdsvejimi kingorna kaffillertoqassaaq.
