Australiamiut Jerusalemip Israelip illoqarfiisa pingaarnersaattut akuersinertik tunuartikkaat

Jerusalemip kitaata Israelip illoqarfiisa pingaarnersaattut Australiami naalakkersuisuusimasunit akuerineqarnera Australiami maanna naalakkersuisunit ullumi marlunngornermi atuuttussaajunnaarsinneqarpoq.

Israel Palæstiinamiullu eqqisseqatiiginnissamik isumaqatigiissusiorsinnaappata Jerusalemip kitaata Israelimi illoqarfiit pingaarnersaattut inissisimalissanersoq kingorna aalajangiivigineqarsinnaasoq Australiami naalakkersuisut isumaqarput.

Australiap nunanut allanut tunngasunut ministeria Penny Wong taama ilisimatitsivoq.

Australiap aalajaalluni Israel ikinngutigiuaannassagaa taassuma ilanngullugu erseqqissaatigaa, marlunnillu naalagaaffeqarnissamut siunnersuut Australiamit tapersersorneqarnerarlugu.

AAMMA ATUARUK Trump eqqisseqatigiinnissamut pilersaarut pillugu: Palæstinamut aamma iluaqutaassaaq

Jerusalemip kitaata Israelip illoqarfiisa pingaarnersaattut Australiami naalakkersuisunit akuerineqartoq, taamanikkut 2018-imi decembarimi ministeriunerup Scott Morrisonip, konservatiiviusup, nalunaarutigaa.

Jerusalemip Israelip illoqarfiisa pingaarnersaattut akuerineqarnissaa, USA-p taamanikkut præsidentiata Donald Trumpip 2017-imi akuerereeraalu, Scott Morrison Australiami naalakkersuisut sinnerlugit 2018-imi nammineq taama aamma aalajangerpoq.

USA-p Israelimi aallartitaqarfia, Tel Avivimiittoq, Jerusalemimut kingorna nuunneqarpoq, tamannalu Palæstiinamiunut aalassatsitsingaatsiarluni.

Israel Palæstiinamiullu Jerusalem illoqarfiit pingaarnersaattut inissisimanissaa kissaatigaat. Jerusalemilu illoqarfiit pingaarnersaattut inissisimalissanersoq suli aalajangivinneqanngimmat nunat assigiinngitsut Israelimi aallartitaqarfitik suli Tel Avivimiitsippaat, Israelip Palæstiinamiullu eqqisseqatigiinnissamik isumaqatigiinniarnerannut akuujumanatik.