Trump eqqisseqatigiinnissamut pilersaarut pillugu: Palæstinamut aamma iluaqutaassaaq

Israelip Palæstinallu eqqisseqatigiinnissaannut pilersaarut tamanut iluaqutaasussatut, Trumpimit ataasinngornermi oqaatigineqarpoq.

Pilersaarullu palæstinamiunut iluaqutaassasoq ilanngullugu oqaatigaa. Pilersaarulli suli saqqummiunneqanngitsoq, Palæstinami siuttut itigartitsissutigereerpaat. Taakkumi isumaqarput, akerleriinnermi USA isumaqatigiissitsiniartartutut inissisimajunnaarsimasoq, Trumpimi Israeli iluaqutissinniarlugu pilersaarusiornerarneqarpoq.

- Eqqisseqatigiinnissamut pilersaarummut nunat tamalaat ilaassanngitsut noqqaassutigaarput, innuttaasummi pisussaaffiinik unioqqutitsineruvoq, Palæstinami ministeriuneq, Mohammed Shtayyeh, taama oqaaseqartoq, AFP allaaserisaqarpoq.

AAMMA ATUARUK USA israelimiut Vestbreddenimi nunassarsisimanerannut akuersaartoq

Jerusalem Israelimi illoqarfittut pingaarnersaattut Trumpimit akuerineqareersorlu, palæstinamiut Trumpimik 2017-imili oqaloqateqarumajunnaarput.

Palæstinami namminersorneq pillugu siuttumut, Mahmoud Abbasimut oqaaseqartartoq oqarpoq, eqqisseqatigiinnissamut isumaqatigiissut palæstinamiunit aatsaat akuerineqarsinnaappat atulersinnaasoq.

Eqqisseqatigiinnissaq pillugu pilersaarutip oqaluuserineqarnissaanut Abbas præsidentip illorsuanut qaaqqusaanngilaq. Pilersaarummi marlunngornermi nangillugu oqaluuserineqassaaq.