Australiamiut utoqqatsernerat avanersuarmiunik misigissutsikkut attuivoq

-Naalakkersuisuusarsimasut politikkerisimasaat inatsisiliarisarsimasaallu pillugit utoqqatserpunga, taakku inatsisit politikkerisimasallu maani innuttaqatitsinnut nikanarsaataasimaqaat naalliunnartorpassuarnillu kinguneqarsimallutik.

Australiami ministeriuneq Kevin Rudd nunap inoqqaavinut utoqqatsernermini ullumi taama oqarpoq.

Australiami nuannanneq taqqavani kisimi naammattuugassaanngilaq. Utoqqatserneq Avanersuarmi aamma qullipittoqarpoq.

-Tassa Radioavisikkut tusarnaarakkit uanga qiavunga, misiginneqatigalugit. Taamatut utoqqatsernerup takussutissai suliassat assigiinngitsorparpassuit taassuma utoqqatsinerup tunuatungaaniikkamik, Uusaqqak Qujaukitsoq oqarpoq.

Nangipporlu:

-Siunnersorusussagaluarpakka tikillugit oqaloqatigalugit, tassa namminneq uukapaatinneqannginnissaat tunngavigalugu. Taamatut misigissuseqarlunga tusarnaarpakka, Uusaqqak Qujaukitsoq oqarpoq.

Avanersuarmiut nunagisaminniit peersitaasimanertik pillugu, ukiorpaalunni suliniuteqareerlutik, 1999-imi danskit naalakkersuisuinit pisortatigoortumik utoqqatserfigineqarmata, Hingitaq ’53 sinnerlugu Uusaqqak Qujaukitsoq ima oqaaseqarpoq:

-toqqaannartumik taamatut uanga inuinnaannguakkuluugama soorunami avanersuarmioqatikka sinnerlugit tiguara, nuannaarutigalugulu naalagaaffiup qullersaata uagutsinnut taamatut utoqqatsissuteqarnera.