Australiamiut tunup avannaami sinikimik ujaasiniartut
Nutaarsiassaqartitsiviup CNN-ip aningaasarsiorneq pillugu nittartagaani, CNNmoneymi, taavalu Australiami BusinessNewsimi oqaluttuarineqarpoq, Australiami aatsitassarsiutileqatigiiffik, Ironbark Gold Limited, Tunup Avannaarpiarsuani kangerlummi, Citronen Fjordimi, sinkimik ujaasinissamut akuersissummik pisimasoq.
Ironbark Gold Limited Bedford Resourcesimut 92 millioni koruuninik akiliisimavoq, neriuutigalugu Citronen Fjordimi 17 millioni tonsinik sinkeqartoq.
Ironbarkimi pisortaaneq, Adrian Byass, BusinessNewsimut oqarpoq, Citronen Fjordimi misissuineq suli naammassinngitsoq, sulilu annertunerusumik sinkeqarnissaa ilimanaateqarsinnanalluartoq.
Namminersornerullutik Oqartussani Aatsitassanut Ikummatissanullu Pisortaqarfimmi ujarassiooq, Anette Clausen, oqarpoq, niuerneq Pisortaqarfimmi suli tusarsimanngikkitsik.
- Bedford Ressource ullumikkut akuersissummik peqarpoq, akuersissummillu allamut tunniussinissatsinnik tusagaqarnikuunnngilagut, Anette Clausen radioavisimut oqarpoq.
- Akuersissummik allamut tunniussinissarput aatsaat tusarutsigu niuerneq aatsaat atuutilersinnaavoq, aamma suliffeqarfik uagut akuereqqaartussaavarput. Aningaasanulli tunngasortai teknikimullu tunngasut ajunngippata, akuersissummik tunniussisinnaavugut.
- Suliffeqarfinnik soqutiginnittoqarmat soorunami nuannaarutigaarput, tamatumami ersersippaa Citronen Fjordimi sinkeqarnera upperigaat, aningaasanillu allaat atuiffigerusullugu, Aatsitassanut Ikummatissanullu Pisortaqarfimmeersoq, Anette Clausen naggasiivoq.
Business News ilisimatitsivoq, niuerneq tallimanngormat tamanut saqqummiunneqarmat Ironbarkip piginneqatiginnissutai pingasoriaatingajammik qaffassimasut.
