Australiamiut aatsitassarsiornermi misilittagaat atorniarneqarput

Aatsitassanut Naalakkersuisoq Jens Erik Kirkegaard taama oqarpoq:

- Ilisimatuussutsikkut suliat aallaavigalugit sulivugut, assersuutigalugu aamma aalisarnermi. Illuatungiliuttut naalakkersuineq tigummigallaramikku ilimatusarneq aallaavigalugu ingerlanneqartassasut assersuutigalugu aalisagartassat, pisassiissutit, ukiumut qassit tonsiussappat. Ilisimatuussutsikkut paasisimasat uppereqqinnaarpaat. Uagut aamma taama oqartariaqarpugut aamma upperivarput, aatsitassarsiorneq ilisimatusarneq aallaavigalugu nalilersuinerillu aallaavigalugit ingerlanneqassasoq, Aatsitassanut Naalakkersuisoq Jens Erik Kirkegaard oqarpoq.

Inatsisartuni ilaasortat arlallit peqatigalugit taanna Australiami angalaqqammerpoq, paasisassarsiorniarluni angalasoqarami.

Australiamut angalanermi paasisat Nunatsinni atorneqarsinnaasut, Inuit Ataqatigiit sinnerlugit Inatsisartuni ilaasortap Naaja Nathanielsenip aamma oqaatigaa, illoqarfinnullu qanittumut uranisiortoqarsinnaanersoq Nunatsinni oqallisigineqartariaqartoq aamma oqaatigalugu.

Nunatsinnilu uranitalinnik aatsitassarsiortoqalissappat Australiamiut misilittagaat aallaaviulluarsinnaasut, Jens Erik Kirkegaardip oqaatigaa:

- Assigiinngitsunik pissarsiaqarfigaarput, aamma angalanerup kingorna. Taqqavani kiinnarsereerlugit, aamma Australiamiut assut ikiuukkusupput, suleqataarusupput. Arlaatigut paasisassanik allatigulluunniit ikiutaasinnaagunik aamma Nunatsinnut neqeroorutigivaat. Assut tapersersuipput taamatut ineriartornitsinni ukiorpassuarni aatsitassarsiornermi nammineq misilittakkatik atorluarsinnaasavut aamma ulluinnarni sulinitsinni taqqavaniittut Australiamiut attaveqarfigisarnissaat suleqatiginissaallu neriuutigaarput, ilimagalugulu, Inuussutissarsiornermut Aatsitassanullu Naalakkersuisoq Jens Erik Kirkegaard, Siumumeersoq, oqarpoq.