Australiami timmissat 5.000-it nassuiarneqarsinnaangitsumik toqorartut
Australiami oqartussat sooq timmissat 5.000-inik amerlassuseqartut toqorarsimanersut nassuiarsinnaanngilaat.
Eqqumiigineqarluinnarpoq timmissat 5.000-it decembarip qiteqqunneraniit maannamut Australiap kujataata kitaani toqorarnerat.
Australiami oqartussat timmissat nappaammit, soorlu timmissat nualluutaannit toqusimanissaat ilimaginngilaat, isumaqarlutilli timmissat toqunartumit toqunneqarsimassasut.
Timmissat amerlanersaat naasut isserannik sullinernillu nerisaqartuupput, aammattaarli naajat arlalissuit toqungasut nassaarineqarsimapput.
Nappaatinik ilisimatuut timmissat toqungasut ilaat misissorsimavaat, toqussutaasorlu immaqa inuit pilersitaraat.
- Avatangiisimi toqunartoq patsisaasinnaavoq. Tamanna nunaateqarnermeersuusinnaavoq suliffissuaqarnermeersuusinnaalluniluunniit, taama oqarpoq Nigel Higgs.
Higgs-ip ilanngullugu ilisimatitsissutigaa timmissat misissoqqissaarneqassasut, sapaatip akunneratalu missaa qaangiuppat toqorarnerannut patsisaasoq paasineqarsinnaassangatippaa.
