Australiami periutsit nunatsinni atorneqarsinnaanngillat
Siunnersuut taamatut isikkoqartillugu Naaja Nathanielsen-mit aamma Sara Olsvig-millu Inuit Ataqatigiinneersuni tparagraf 37 naapertorlugu apequtigineqarpoq.
Australiami Canada-milu periutsit atorneqartut inersuussutigalugit taakkua siunnersuuteqarput.
Aatsitassarsiornermut apeqqutinut tunngatillgu nunat taakkua marluk misilittagalittut maligassiuisutullu Naalakkersuisunit saqqummiunneqartarput.
Uanili assersuussineq pineqartunut naleqqutinngitsoq Aatsitassarsiornermut Naalakkersusup Jens-Erik Kirkegaard akissutaani atuarneqarsinaavoq.
- Ilumoorpoq uagut Naalakkersuisuni nunani killerni allani aatsitassarsiornikut misilittagaqarfiusuni avataanersut aningaasaliissuteqarniartut qanoq pissusilersorfogineqartassanersut soqutigisarigatsigu, Jens-Erik Kirkegaard akissuteqarluni taama allappoq.
Taamaalilluni Kalaallit Nunaat nunanut aatsitassarsiornermik misilittagaqarluartunut assersuunneqarsinnaanngilaq.
Aatsitassarsiorniarnermut atatillugu aningaasaliisartunik avataaneersunik nunat allamiut atuisarnerat paasiniarlugu radioaviisimit itisilertinniarsimagaluarparput nassuiartillugulu tamannali iluatsinngilaq, pineqartoq pillugu Aatsitassanut Naalakkersuisoq Jens-Erik Kirkegaard oqaaseqartinniaraluarlutigu attavigisinnaasimanngilarput.
Taamaattorli siunnersuuteqarluni paragraf 37 naapertorlugu apeqquteqartoq Sara Olsvig Naalakkersuisuimit akissutigineqartoq naammaginngilaa.
- Ajoraluartumik akissut erseqqippallaanngilaq, Naalakkersuisut akissuteqarlutik oqarput nunatsinni aatsitassarsiorniartut aamma misissueqqaarniartut taamatullu aningaasaliiniartut taakkua maannakkut nunatsinni nakkutigineqartut aappaatigullu oqarlutik, Sara Olsvig oqarpoq - soorlu uagut siunnersuutigisatsitut aamma Australia-mi atorneqartoq, naalakkersuisutiguunngitsunik immikkut nakkutilliisartoqarneq atorneqarsinnaasoq, nammineerlutillu Australiamut attaaveqartarsimallutik periuseq taanna pillugu, naggataatigullu oqarlutik Australia-mi periuserineqartoq nunatsinni atorneqarsinnaanngitsoq, Sara Olsvig oqarpoq.
Jens-Erik Kirkegaard akissuteqarnermini innersuussutigaa
Naalakkersuisut immikkut ittunik assigiinngitsutigut ilisimasallit proffessionalliusut atortaraat. radioaviisimit siornatigut saqqummiunneqartut malillugitt taamatut oqarneq eqqunngilaq.
Immikkut ilisimasalinnik nammineerluni toqqaagaanni aalajangersimasumillu atortaraanni taakkualu akissarsiaqartikkaanni arlaannaannulluunniit attuumassuteqartutut naatsorsuutigineqarsinnaanngillat.
isornartorsiuneq Anders Meilvang-ip aamma Transperance Greenland-ip Naalakkersuisunut saqqummiunnikuvaat, arlaannaannulluunnit attuumassuteqanngitsutut nakeriarsiortunngitsutullu arlaleriarlugit taaneqartarluni.
Namminersorlutimmi Oqartussat nammineerlutik nassuerutigaat, inatsiseqarnermut pisortap eqqartuussissuserisunit misissuisitsineq arlaannaanulluunniit tattuumassuteqannginnerarlugu oqarnerat
Soorlutaaq uran pillugu nalunaarusiaq namminerlutik oqartussanit arlaannannulluunniit attuumassuteqanngitsutut taaneqartoq. nalunaarusiaq taanna Aleqa Hammond-ip arlaannaannulluunniit attuumassuteqanngitsutut taavaa. taakkuali marluk tamarmik ilumuunngillaat.
Sara Olsvig isumaqarpoq kikkut Kalaallit Nunaannukassanersut qulakkeerlugu paasineqartariaqartut.
- Arlaannaannulluuut attuumassuteqanngitsunik aalajangersimasunik nunatsinni ukiorpaalunni atuisoqarsimasoq nalunngilarput, isumaqarpugullu pitsanngorsaanissamut suli inissaqartoq, taamaattumik immikkut pilersitsisinnaaneq siunnersuutigaarput naalakkersuisullu aperivagut qanoq isumaqarnersut, massakkullu akipput taamaaliorunatik immikkut naliliisartunik pilersitsinissaq misissortariaqartoq Sara Olsvig IA inatsisartuni aamma Folketingemi ilaasortaq oqarpoq.