Australiami ministeriuneq aboriginerinut utoqqatserpoq

Australiami inatsisartut ataatsimiittarfiata silataani inuppassuit katersuussimasut præsident Kevin Ruddip ullumi utoqqatsernera isiginnaaruterujussuarmi isiginnaarpaat.

Nunap sinerani illoqarfiit rådhusiisa silataanni atuarfinnilu, oqaluttuarisaanermi pingaarutilimmik Canberrami præsidentip Kevin Ruddip utoqqatsernera tusarnaarpaat.

Naalakkersuisuusarsimasut politikkerisimasaat inatsisiliarisarsimasaallu pillugit utoqqatserpunga. Taakku inatsisit politikkerisimasallu maani innuttaaqatitsinnut nikanarsaataasimaqaat naalliunnartorpassuarnillu kinguneqarsimallutik, præsident Kevin Rudd ilaatigut oqarpoq, ilangullugulu oqaatigalugu inatsisartut naalakersuisunilu ilaasortat tamaasa sinnerlugit qamannga pisumik utoqqatserluni. Inatsisartut ataatsimittarfianiittut aboriginerit hunnorujut missaaniittut tamarmik qulliliorlutik utoqqatsernermik tusarnaarput, Sydneymi inoqannginnersarujussuaq inunnik ulikkaarpoq tamaanilu aamma sialussuup ataani isiginnaaruterujussuarmi utoqqatserneq isiginnaarrapaat.

-Nuannaaqaanga utoqqatserneq tusaagakku, ikitta mamisikkiartulernissaannut piffissanngorpoq, tusarnaartut ilaat arnaq oqarpoq.