Australiami kangimut sineriammi siallerujussuarmat qarsutsisoqarpoq uivertoqarlunilu

Australiap kangimut sineriaani sila suli sakkortuvoq. New South Walesimi Australiallu ilaani allani panernersuaqareerpoq, pinngortitamilu arlaleriarluni ikuallarujussuartoqartareerluni.

Nunap ilaani maanna siallerpoq. Siallerujussuarmalli nunap ilarujussuini qarsutsisoqarpoq

New South Walesimi ulluni pingasuni kingullerni 1998-imili aatsaat taama siallertigisoq, nutaarsiassaqartitsivik Reuters allappoq.

Naalagaaffiit ilaani silarlummat, angerlarsimaffiit ikinnerpaamik 80.000-it innaallagiaqanngillat, silalu New South Walesimi angallannermut sunniuteqarpoq. Assersuutigalugu Narribrimi Sydneymit kujammut 500 kilometerinik ungasissuseqartumi qimuttuitsoqarfik qarsutsinernit eqqugaavoq.

Aamma sakkortuumik anorlermat, aqquserngit arlallit qassutsinerit orpiillu anorlernerani uppissimasut pissutigalugit matuneqarput.

Sydneyp umiarsualiviani tusaamaneqarluartumi ikaartaatit arlallit uninngatinneqarput, malissuillu 14 meterisut portussusillit illoqarfimmi sissani nalunaarsorneqarlutik.

/ritzau/