Australiami illoqarfissuarmi Melbournemi aneqqusaajunnaartut

Australiami illoqarfissuarmi Melbournemi sapaatit akunnerini arfinilinni tulliuttuni unnukkut unnuakkullu silamut anineq inerteqqutaalerpoq.
Silamut aneqqusaannginneq ullut tamaasa unnukkut arfineq-pingasuniit ullaassakkut tallimat tungaanut atuutissaaq. Assi © : William West/AFP/Ritzau Scanpix
Allattoq Ritzau
aggustip 02-at 2020 18:24
Nutserisoq Andreas Wille

Tamanna naalagaaffimmi Victoriami, Melbournep inissisimaffigisaaniittumi coronamik tunillatsittut amerlinerisa kingunerannik aalajangerneqarpoq.

Silamut aneqqusaannginneq ullut tamaasa unnukkut arfineq-pingasuniit ullaassakkut tallimat tungaanut atuutissasoq, Victoriami ministeriuneq, Daniel Andrews, nutaarsiassaqartitsivik dpa naapertorlugu, sapaatiummat tusagassiortunik katersortitsinermi oqarpoq.

Nalaagaaffimmi tassani ajunaarnersuaqartoq ministeriunerup aamma oqaatigaa, politiillu pisinnaatitaanerulerput.

Melbournemi aneqqusaannginnerit saniatigut inuit ullormut ataasiaannarlutik niivertarfiliarsinnaatitaalerput.

Silami timersornerit sivisunerpaamik ullormut akunnermik ataatsimik sivisussuseqartassapput, angerlarsimaffimmiillu kilometerit tallimat iluanni taamaallaat timersortoqarsinnaalluni. Ulluunerani sammissassat piffissami tassani tamavimmik ingerlanneqaqqusaanngillat, atuarfiillu tamarmik nittartakkakkut atuartitsinerit ingerlatissavaat.

- Alloriarneruvoq annertooq, pisariaqarporli, Daniel Andrews oqarpoq.