Australiami ikuallattoqarnerani ajunaartut pingasunik ilapput
Australiap kujataata kangisissortaani ikuallarujussuarnermi ajunaartut ukiutoqqami pingasunik ilasut uppernarsarneqarpoq.
The Guardian naapertorlugu Australiami nunap immikkoortuani New South Walesimi qatserinermut oqartussat tusagassiortunik katersortitsinermi taama oqarput.
Ajunaartut marluk biilini nassaarineqarput, pingajuallu illumi ajunaarsimasoq nassaarineqarluni.
Tamatuma saniatigut inuk alla Lake Conjolami illumi nungulluni ikuallassimasumi najugaqartoq maqaasineqarpoq. The Sydney Morning Herald taama allappoq.
Aamma inuit sisamat decembarip ulluisa 30-anni ajunaarput.
Taamaalilluni inuit katillugit 15-it Australiami maanna ikuallattoqartarneranut atatillugu ajunaarsimasut nalilerneqarpoq.
50.000-it innaallagiaqanngitsut
New South Walesimi ikuallanneq kujammut sinerissami South Coastimi jannuaarip aallaqqaataani sakkortunerpaajuvoq.
- Angerlarsimaffiit maannamut 176-it aseruatitersimasut uppernarsarsinnaavarput, qatserinermut New South Walesemi kommissærip tullersortaa Rob Rogers oqarpoq.
- Imaaliallaannarluta aaqqissinnaanngilarput.
AAMMA ATUARUK Australiami inuit tuusintilikkaat qimagussorneqartut
South Coastimi angerlarsimaffiit 50.000-it ikuallattoqarnerani innaallagiaqanngitsut, oqartussat paasissutissiissutigaat.
- Innaallagiamut attaveqaatit ikuallannernit kingullernit ajoquserujussuarneqarput, innaallagiallu aqqutaanut napparutit ikinnerpaamik 40-t ippassarli aserorput, nukissiorfiup Endeavorip South Coastimi immikkoortortaqarfiata paasissutissiissutigaa.
Innaallagiaqannginnerup internettimut oqarasuaatinullu attaveqarfiit sunnerpai. Taamaammat qassit maqaasineqarnersut oqartussanit nalileruminaappoq.
Qatserinermut kommissæri: Ajunaarsimasut amerlanerusinnaapput
The Guardian naapertorlugu New South Walesimi qatserinermut kommissæri, Shane Fitzsimmons, taama paasissutissiivoq.
AAMMA ATUARUK Australiami nammineq kajumissutsiminnik qatsereqataasut marluk ajunaartut
Taamaammat ajunaarsimasutut nalunaarsorneqartut amerleratarsinaanerat australiamiut piareersimaffigissagaat kommissæri oqarpoq.
/ritzau/
