Augusta Salling: Nukissiorfiit aningaasanut inatsimiissapput
- Inatsisartuni amerlanerussuteqartut aalajanginngippata –aalajangertoqanngilarlumi, taava Nukissiorfiit aktieselskabinngortinneqarsinnaanngillat. Aktieselskabinngortitsinissamik suliaq inatsisartut ukiaq manna oqaluuserisassaanniit peerneqassasoq, Atassutip Siumullu Inatsisartuni ilaasortaatitai isumaqatigiipput. Taamaattumik aningaasanut inatsisissami Nukissiorfiit soorunami Namminersornerullutik Oqartussat ataaniittutut inissisimassaaq, Augusta Salling oqarpoq.
Atassutip politikikkut oqaaseqartartuata erseqqissarpaa, Nukissiorfiit aktieselskabinngortinneqanngikkaluarlutik Nunatta Karsiata avataaniit aningaasanik atorniarsinnaanissaq misissorneqassasoq, Siumut Atassutillu isumaqatigiissutigigaat.
- Kisianni Nukissiorfiit aningaasanut inatsimmiit peerneqarnissaat, Naalakkersuisut aalajangiusimaannassappassuk, taava Aningaasaqarnermut Ataatsimiititaliamiit isumaliutissiissutitsinnut ilanngutissavarput. Taava qularinngilara, Inatsisartut isummaminnik saqqummiussiumaartut, Atassutip politikikkut oqaaseqartartua aamma Aningaasaqarnermut Ataatsimiititaliami siulittaasuusoq, Augusta Salling oqarpoq.
2009-mi Aningaasanut inatsisissatut siunnersuut iluarsaassaq Inatsisartut aningaasaqarnermut ataatsimiititaliaata, Augusta Sallingimit siulittaasuuffigisaata, sisamanngorpat ataatsimiissutigissavaa.