Suka Frederiksen Inatsisartuniilerpoq
Taasissutit qinersinerup unnuani Narsap katersortarfiani atuutinngitsutut nalunaarutigineqartut atuunnerisa misissorneqarnissaat pillugu qineqqusaartup kissaatigalugu naammagittaalliutaa Qinersinermut Ataatsimiititaliap Kommuni Kujallermi Qinersinermik siulersuisunit tiguaa.
Narsami qinersivimmi taasissutit 13-it atuutinngitsutut nalunaarutigineqartut akuerineqassasut, Qinersinermut ataatsimiititaliaq aalajangerpoq. Tamanna isumaqarpoq taasissutit 13-it makku qinersinerup inerneranut atuuttutut ilanngunneqassasut:
Andreas Uldum, Demokraatit: ataaseq
Sara Olsvig, Inuit Ataqatigiit: sisamat
Naja Lund, Inuit Ataqatigiit: ataaseq
Kim Kielsen, Siumut: sisamat
Ineqi Kielsen, Siumut: ataaseq
Suka K. Frederiksen, Siumut: ataaseq
Aqqaluaq B. Egede Inuit Ataqatigiit: ataaseq
Suka Fredriksenillu qinersisai ataatsimik ilammata Jess Svanelu amerlaqatigiinnik qinerneqarsimalerput, tassa 172-init qinerneqarsimammata. Taamaalilluni makitsisoqartariaqalerpoq, makitsinerullu kingorna Suka Frederiksen Inatsisartunut ilaasortanngorpoq, Jess Svanelu sinniisussat siullerilerpaat.
Allannguinerli annertunngilaq, Siumummi Demokraatit Atassutikkullu peqatigalugit Naalakkersuisuutitaqalissammata, taamaalillunilu ilimanarluni Jess Svane Inatsisartunut aamma isissasoq.
IA-mut qinersisut ataatsimik ilasut
Ataatsimiinnermi aamma aalajangerneqarpoq, taasissut ataaseq Maniitsumi qinersivimmi kukkusoqarneratigut atuutsinneqanngitsoq atuuttutut akuerineqassasoq. Taasissut Gerth Nielsenimut Inuit Ataqatigiit tuppoq.
Taamaalilluni Nunatsinni partiit anginerit marluk akornanni assigiinngissut taasissummik ataatsimik millivoq, tassa qinersinerup inernerani Siumut 325-inik Inuit Ataqatigiinnit taaneqarnerusutut akuerineqarmata - tassalu Naalakkersuisuutitaqarnerup illuatungiliuttuunerullu nikingassutaa, taasissutit 325-it.
Aammattaaq Demokraatit Partii Nalerarlu sinnerlugit qineqqusaartut akornanni sinniisussat allattorsimaffiannit makitsisoqarpoq. Tulleriiaarnerat uani takuuk.