Atuisut siunnersuisoqatigiivisa akit qaffappallaarsoraat
Uffarnerup, kiassarnerup, imermik qalatitsinerup pisiniarfimmiluunniit pisiniarnerup tamarmik akitsornerujussuat Atuisartut siunnersuisoqatigiivinit isumakulunnartoqartinneqarpoq, pissutsit taamaattut utoqqalinersiutilinnut nunaqarfinnilu akissaatikinnerusunut sunniuteqarnerluppallaaqimmata. Siunersuisoqatigiit siulittaasuata, Nikolaj Ludvigsenip naalakkersuisumut, Siverth K. Heilmannimut allakkamini taanna qinnuigaa, SIK, KNAPK, partiit, Arnat peqatigiiffii Atuisartullu siunnersuisoqatigiivi ataatsimut isumasioqatigiisseqqullugit. - Piniartut aalisartullu ajornartorsiuteqaleraangata susassaqaqatigiit piaartumik isumasioqatigiissinneqartarput, atuisartulli eqqorneqartillugit susoqarneq ajorpoq uagullu isumasiorneqanngisaannarpugut. Maannakkut Naalakkersuisumut allagaqarpunga pisiassat akitsoriartupiloornerisa sunniutaat itisilerlugit misissuiffigisinnaaniassagatsigit, isumasioqatigiissinneqaqqulluta, eqqarsaatigilluagaanngitsunik aaqqiigallartoqartinnagu, Nikolaj Ludvigsen oqarpoq. Allakkalli suli nassiunneqanngitsut Siverth K. Heilmann siunnersuut pillugu qanoq isumaqarnersoq Radioaviisimiit aperigatsinni siunnersuut ilassilluarpaa.
- Atuisartut siunnersuisoqatigiivisa isumasioqatigiinnissaq siunnersuutigippassuk naalakkersuisoqarfiup tamanna aaqqissussappagu ammaffigaara, Siverth K. Heilmann oqarpoq, nangillunili isumasioqatigiinnissap pilersaarusiornissaa piffissaqarfigineqartariaqarmat aasaanerani inuit sulinngiffeqareerpata tamanna pisinnaassasoq.
