Atuisoq isikkorissarpaat

Atuisartunut Siunnersuisoqatigiit nittartagaat www.atuisoq.gl atuisartunut ajornannginnerulersillugu allatullu ilusilersillugu iluarsaanneqarpoq.

Nittartakkap pitsaanerulerlunilu paasiuminarnerulernissaa, Atuisartunut Suinnersuisoqatigiit neriuutigaat, atuisartunut soqutiginartunik allaaserisaqartarlutik, paasissutissanillu pingaaruteqartunik allaaserisaqartarniarlutik.

Paasissutissat pingaarutillit, nioqqutissanik misissuinermi inernerit, akillu pillugit misissuinerni inernerit paasissutissallu allat Atuisoq.gl-imi alakkarterneqarsinnaassapput

- Paasissutissat tamakku Kalaallit Nunaanni atuisut pisinnaatitaaffitik pillugit eqqummaarinnerulernissaannut peqataassapput, Looqi Svane, atuisartunut siunnersorti oqarpoq.

Atuisut Maalaaruteqartarfianni aalajangiinerit assigiinngitsut maanna atuarneqarsinnaapput, pisisartut pisiniarfiillu akornanni aaqqiagiinngissutit pillugit aalajangiinernut tunngaviusut suunersut atuarneqarsinnaammata.