Atuisartut Siunnersuisoqatigiit isumaqataapput
Namminersornerullutik Oqartussat Pilersuisoq A/S-illu nunaqarfinni kiffartuussinissamut isumaqatigiissutaat 50 millioni koruuninik annertussusilik atorlugu nunaqarfinni nioqqutissat akikinnerusariaqarnerat pillugu Naalakkersuisut siulittaasuata Hans Enoksenip Siumup nuna tamakkerlugu ataatsimeersuarnerani oqaaseqarnera Atuisartut Siunnersuisoqatigiit siulittaasuata naammagisimaarpaa.
Allattoq Louise M. Kleemann
februaarip 08-at 2008 14:09
- Atuisartut Siunnersuisoqatigiit naalakkersuisunut KNI A/S-imullu tamanna ukiuni arlalinni innersuussutigisarsimavaa, Atuisut siunnersuisoqatigiit siulittaasuat Nikolaj Ludvigsen tusagassiuutinut nalunaarummi allappoq.
Nioqqutissat nunani EU-mi ilaasortaasuni akitsorneqarnissaat nalunaarutigineqartorlu Kalaallit Nunaanni ingerlaannaq akitsorneqartarnerat Atuisartut siunnersuisoqatigiinnit unitseqquneqarpoq.
Nioqqutissat pigeriikkat suli nungunngitsut akitsorneqartarnerat eqqarsarnartoqartinneqarpoq. Niivertarfiit nioqqutissanik sioqqutsillutik akitsuisarput, pisisartut akiliuteqarnerunerat iluaqutigalugu tamannalu unitsinneqartariaqarpoq, Atuisartut Siunnersuisoqatigiit siulittaasuat Nikolaj Ludvigsen tusagassiuutinut allappoq.
