Atuartuutini ukallinik titartaaqqunngilaa

Tysklandimi ilinniartitsisup ukallinik ersigisallip atuartuutimi ilaat eqqartuussivimmut suliassanngortikkaluarlugu ajorsaqqammerpoq. Ilinniartitsisup atuartoq allattarfissuarmut ukallinik titartaasarmat eqqartuussivimmut tunniussimavaa.
Allattoq Elisa Isaksen
juulip 20-at 2010 11:40

Ilinniartitsisup ukallit ersigisorujussuuvai. Taamaattumik atuartoq eqqartuussivimmut suliassanngortippaa, isumaqarami atuartup ukallinik titartaanermigut naalliutsinniarsarigaani.

Atuartup ukallinik titartaasarnerata eqqartuussivimmiit inerteqqutinngortinnissaa ilinniartitsisup piumasarigaluarpaa.

Allattarfissuarmut ukallimik titartaasoqarsimagaangat ilinniartitsisoq tatamilluni qiallunilu qimaasarsimasoq takunnittut eqqartuussisumut oqaluttuaraat. Atuartoq eqqartuussivimmut tunniussaq, niviarsiaraq, ukallinik titartaasarsimannginnerarpoq. Tamanna peqqutigalugu ilinniartitsisup naammagittaalliutaa eqqartuussisup itigartippaa.

Ilinniartitsisup atuartoq alla eqqartuussivimmut ukiut marluk matuma tunniussimavaa, ukallinik aamma ersisaarneqartarnini pillugu.

Tassani ilinniartitsisup atuartoq isumaqatigiissusiorfigaa atuartoq oqaqqinngisaannassasoq ilinniartitsisoq ukallimik takugaangami tusaraangamiluunniit tatamittartoq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq