Atuartut tamarmik seqinermut isiginnaarutinik tunineqassapput
Qaammatit marlussunnguit qaangiuppata, aggustip aallaqqaataani seqernup pulanera ullaakkut isiginnaarneqarsinnaassaaq. Seqernup pulanerata takunissaa kusanaraluaqaluni, illersuuteqanngikkaanni isinut ulorianartorujussuuvoq. Tassami seqineq toqqarlugu isigigaanni isit ajoquserneqarsinnaammata.
Arne Hermann Ilinniusiorfimmeersoq oqaluttuarpoq Danmarkimiit tunissuteqartoqarneratigut seqinermut isiginnaarutit isumannaatsut 10.000-it atuartunut tamanut agguaanneqassasut, taamaalillutik seqernup pulanera uloriananngitsumik isiginnaarsinaanngussavaat. Aturfinnut tamanut agguaanneqarnissaat Inerisaaviup isumagisussaavaa.
Tunisusoq tassaavoq Frederik Paulsen, suliffeqarfissuarmi nakorsaasiornermik suliaqartumi, Ferring Pharmaceutical-imi, nunani tamalaani immikkortartaqartumi, siulersuisuni siulittaasoq.
Seqinermut isiginnaarutit qanoq atornissaat pillugu kalaallisut ilitsersuutitaqassapput. Takkuteriarpatalu Qanoruumi takutinneqarumaarput.
Taamaallaat nunatta avannarpiaani, tassa Qaanaap avannaani seqernup tamakkerluni pulanera takuneqarsinnaassaaq, assersuutigaluguli Nuummi seqernup pulanerata 60 procentiinnaa takuneqarsinnaassaaq.
