Atuartut sakiallunnersut paasiniarpaat

Sakialluutip tuberkulosip nunatsinni akiorniarneranut tunngatillugu atuarfinni tamani atuartunik misissuisoqangajalerpoq, Dronning Ingridip napparsimmavissuani peqqissaasoq tb-mik suliaqartoq Thomas Ringdahl taama oqarpoq.

Atuarfinni tamani atualersut atuarunnaalersullu misissorniarpavut, tassa 1.klassimi 10. aamma 11.klassimi atuartut misissorneqassammata.

Meeqqat nunaqarfimmiut misissorneqarnissaat suli pilersaarusiunngilarput, tikikkuminartut siulliunniarsarigatsigit atuarfinni misissueqqaassaagut, kisianni soorunami meeqqat nunaqarfimmiut misissussavagut, qaquguli pissanersoq oqaatigisinnaanngilara.

Misissuinissatsinnut atortussatsinnik akisuunik maanna Dronning Ingridip Napparsimmavissuani misissuisarfimmi atortoqalerpugut, aammik misissueriaaseq kvantifronimik taaneqartartoq maani atorsinnaalerparput. Siornatigut aak atorlugu misissuiniaraangatta misissugassat Danmarkimut nassiuttariaqartarnikuuagut. Taassumalu saniatigut kujataani tuberkulosesygeplejerskimik atorfinitsitsissaagut taqqavani illoqarfinni sullissisussamik.

Tuberkulosimik tunillaattartumik nappaatillit kisimik tunillaasinnaapput, tuberkulosertullu ilaannaat tunillaassinnaasumik nappaateqarput. Tunillaassutaasinnaasoq nuak qanermiillunilu puanniittarpoq, tassa quersoraanni, tangajoraanni qiseraanniluunniit bakteriat silaannarmut pisarput inummillu allamit najuunneqarunik najuussisup puaani aseruuttoqalerneratigut tuberkulosinnguuttarluni.

Tuberkulosimik nappaatillip ilisarnaatigai quersorneq, nuammillu kinertumik qaffakkaatitsineq qitserarnerlu, sanigorneq, nererusussuseqannginneq, kissarneqarneq, taavalu unnuakkut kiagoruluttarneq tuberkulosimik nappaatillip ilisarnaatigisarpai, Dronning Ingridip Napparsimavissuani tuberkulosesygeplejerski Thomas Ringdahl Jaaku Lyberthimit apersorneqarluni oqarpoq.