Atuartut kalaallisut oqalussinnaanngitsut nuanniilliorput
Atuartunut nutaanut kalaallisut oqaasiliunngitsunut immikkut ittumik tapersersuisartussanik peqartuuppat tamanna qaangerneqarsinnaassagaluartoq, meeqqat atuarfianni ilinniartitsisut kattuffiat, IMAK, isumaqarpoq.
IMAK-ip sinniisoqarfia Ilulissani sapaatip akunnerata naanerani ataatsimiikkami, Inatsisartunut, Naalakkersuisunut kommunimullu kaammattuuteqarpoq, atuartunut kalaallisut oqaasiliunngitsunut pitsaanerusumik neqerooruteqaleqqullugit. Soorlu ilinniartitsisunik atuartunut tapersersuisussanik allanillu iliuusaasinnaasunik. Taamaaliornermi atuartumut, atuaqatigiinnut ilinniartitsisumullu iluaqusiisussaavoq, soorlu avataaneersunik ilinniarsimasunik pisariaqartitanik sivisunerusumik Nunatsinniitsitsinnaanngorneq periarfissinneqassagaluarpoq, IMAK isumaqarpoq.
Atuartut kalaallisut oqalussinnaanngitsut ingerlaannaq klassinut pioreersunut atuaqataalersinneqartarput, atuarfimmut piukkunnarsaqqaarneq ajorput, allatulluunniit tapersersorneqassanatik, inuunermik tulluarsarnissaanut aqqutissiorneqaqqaaratik, atuarfimmiilerneranni atugaannik oqilisaasussanik.
