Atuartut arsaqattaarnerannut tuttu ajugaavoq
Ukiualunnut kingumut qiviassagaanni,isiginnaartartut 2000-iniit 500-t tungaannut apparsimapput
Allattoq Per Andersen
oktobarip 13-at 2011 12:57
Atuartut arsaqattaarnerat ukiut 40-t matuma siorna isiginnaarianit ornigarluarneqartarsimavoq. Taamanikkut aningaasaliisutut pingaarnerpaapput Bikuben, ukiullu 40-t kingorna arsaqattaarneq torrammik ateqalersimavoq, igininnaartukinnerulersimallunili.
- Kingumut eqqarsaatigilerukku, taamanikkut isiginnaartut 2.000-t missaat isiginnaariartarnikuupput. Eqqaamavara issiaviit tamavimmik arsaaffiullu sinaatungaa ulikkaavittarnikuusoq. Cafeteerialu pikaniikkallarmat, igalaat ulikkaavillutik isiginnaartoqartarnikuuvoq. Suna tamaaviat tassa ulikkaavittarnikuuvoq, Martin Berglund Kangillinnguit Atuarfianni ilinniartitsisuusoq knr.gl-imut oqarpoq.
Martip nammineerluni aamma pissartanngoqataaneq misiginikuuaa, taamanikkut 1976-imi Atuarfik Samuel Kleinschmidt-imi anden realimi atuarallarami Qorsussuarmiunut ajugaagamik. Kingumut eqqarsaatigileraangamiuk eqqaamavaa, atuartut allagartarsualisartartut atuarfimmik atianik allassimasumik. Nipertillu illugalugu timersortarfiup qalia qangattartingajattarallaramikku.
Ukiullu 40-t qaangiuttut arsaqattaarnerit aallartinneqarmatali, qangatut arsaqattaarnerit ornigarneqarunnaarsimapput. Tamannarpiarlu aaqqissuisuusut eqqartuleruttorpaat.
- Isumaqarpugut atuartut maanna ukiaanerani atuanngiffik arsaqattaarnerminngarnit salliuttalersimagaat, kiisalu tuttunniarfiup naligaa. Tamannarpiarlu pissutigalugu eqqartorparput arsaqattaartarnerit tulluarnerusumut nikisissinnaannginnerivut. Malugisinnaagaannilu qangatut arsaqattaartarnerit ornigarluarneqarunnaarsimasut, allatut eqqarsarnissaq tullinnguuttarpoq, Martin Berglund oqarpoq.
Ulluni marlunni arsaqattaarnerit ingerlanneqarsimagaluartut, isiginnaariat katillugit 500-t missaannaat isiginnaariarsimapput. Unammiuaarnerilli asuliinnaanngillat.
Unamminerit 102-t ingerlanneqareernerini, atuarfiit pissartanngorniutivinnerni ajugaanerpaat nassaarineqarput.
Nuussuup Atuarfia ukioq manna atuarfinni ajugaanerpaatut siornatut inisseqqippoq, katillugit ajugaanniutivinnerni 14-iusuni katillugit tallimariarlutik ajugaangamik. Tulliullutik inissipput Kangillinnguit Atuarfiat, kiisalu Nuuk Internationale Friskole, taakku katillugit pingasoriarlutik ajugaapput. Ukaliusap Atuarfia marloriarluni ajugaavoq, Atuarfik Hans Lyngelu ataasiarluni ajagaavoq.
