Atuartut angalanissaannut Zikaza ikiuuppoq
Nunanut allanut angalanermi inuttut ilisimasatigullu ineriartortoqaertarpoq inuiaqatigiillu killiffiat nalileruminarnerulersarluni. Kinaassuseq ersarinnerulersarpoq inuiaat kulturillu allat takusimatilulgit. Taamaammat atuaqatigiit angalaniarput.
- Angalarusoqaagut. Taamaammat neriuppugut tusarnaartitsinermut takkussortoqarluarumaartoq. Nunani allani angalanikkut paasinarnerulersarpoq inuiaqatigiit suup tungaanut ingerlatikkusunnerlugit, Paneeraq Larsen oqarpoq.
Sumorpiaq angalanissaq suli aalajangiunneqanngilaq. Tassani apeqqutaalluinnarpoq aningaasat katersat qanoq amerlatigilersimanissaat. Arfininngorpat tusarnaartitsinerup kingorna paasinarsiumaarpoq Tysklandimut, Frankrigimut Brasiliamulluunniit angalasoqassanersoq.
- Inuiaqatigiilerinermi eqqartorpagut sorsunnersuarmi kingullermi juutinik toqoraaviit koncentrationslejrit. Tamakku piviusumik assut takorusuppagut, atuaqatigiinnit Ivalo Christensen oqaluttuarpoq.
Tusarnaartitsinernik annertuunik aaqqissuussineq atuaqatigiit misilittagaqarfiginngilaat, kisianni tamarmik pilerillutik suliartik aallartippaat. Qanoq iluatsilluartiginissaa siunissap takutikkumaarpaa.
- Tusarnaartitsinermik aaqqissuineq akikitsuinnaanngilaq piffissartornaqalunilu, taamaammat assorsuaq nuannaarutigaarput Zikaza-kkut tikikkusussimammata. Billetit pisiarineqarsinnaapput Sanaartornermik Ilinniarfimmi, Pisiffik Pisattani, Taseralimmi, Anunimi aamma Centrum Kioskimi, Anja Kristensen oqarpoq.