Atuartut: Alianaqaaq
Nuummi atuarfiit ilaata, Qorsussuup matuneqarnissaanut siunnersuuteqartoqarnerata kingorna, atuarfimmi atuartut sinniisaat napeqatigiipput. Atuartut sinniisaasa siulittaasuat Uiloq Leonhardt ima oqarpoq:
- Tusagaq uagutsinnut alianartuuvoq, ingammik immikkut ilinniartsinneqartartut eqqarsaatigalugit, tassami taakku anigugassaat imaannagilaq, ilinniartitsisunik nutaanik ilinniartitsisoqalissapput avatangiisillu nutaat sungiunniartussaassallugit.
Nuummi atuarfiit nutaannginnersaat matuneqassagaluarpat, atuartut sinniisaasa siulittaasuat, Uiloq Leonhardt politikerinut qinnuteqarpoq:
- Nuutsinneqassagutta neriuutigaarput atuarfimmi nutaami ataatsimoortsinneqassasugut aammalu minnerpaamik ilinniartitsisoq ataaseq uagutsinnut malinnaatinneqassasoq.
Matusinissamik siunnersuuteqartoqarnera atuartut akunnerminni imatut oqaluuserinngilaat. Neriuinnarput atuarfitsik matuneqassanngitsoq, Uiloq Leonhardt ima oqarpoq:
- Atuarfitsialaavoq, taamaattuuginnarnissaalu neriuutigaarput, uiloq Leonhardt oqarpoq.
Atuarfiup Qorsussuup matuneqarnissaata siunnersuutigineqarneranut pissutaanerpaapput, atuarfiup nutaanngippallaarnera aammalu aserfallassimanera. Taamatut oqarsimaneq Uiloq Leonhardtip isumaqatiginngilaa:
- Nutaanngippallaarsorinngilara, torsuusat angalaarfigalugit nuanneqaaq, sofaqarpoq eqqissisimaarfiusinnaasunik. Pinnguartarfeqanngilaq taamaattorli nuannisaartaqaagut. Atuartut sinniisaat Uiloq Leonhardt naggasiivoq.
Qorsussuarmi atuartuutillit angajoqqaat oqaaseqartartuannut ilaavoq Margrethe Thårup Knudsen. Taassuma qitornaa arfineq pingasunik ukiulik 4. klasse-mi atuartuuvoq. Angajoqqaat qisuariaataannut pissutaaqataavoq, atuarfiup matunissaanik nalunaarnerup kingorna, politikerinit oqariartuuteqarneq tukattorujussuusimammat aammalu toqqaannartumik oqaluttuunneqarsimannginnamik.
- Apeqqusiivugut, tusarniaatitsisoqarpoq tusarniakkatillu tusarnaarnagit!
Angajoqqaanik, sulisunik, atuartunik atuarfimmullu attuumassuteqartunut tusarniaatitsinermi, Kommuneqarfik Sermersuumit politikerimik ataasinnguamilluunniit takkuttoqanngilaq. Angajoqqaat tusakkaminnut ernumaqisut politikerinit terliganeerneqartutut misigisimalerput, Margrethe Thårup Knudsen oqarpoq:
- Politikerimik takkuttoqanngilaq ataasinnguamilluunniit, tamannalu apeqqusernarpoq. Apeqaqutissaqaraluaqaagut, tassami aperineqarpugut sooq ammaannartikkusunneripput, politikerit akissutissaat suli utaqqivagut!, Nuummi atuarfimmi Qorsussuarmi atuartuutilik, Margrethe Thårup Knudsen oqarpoq.