Atuartartut Qaanaaq pinngitsoorumanngilaat

Aviisimi ullormut saqqummersartumi Politikenimi silassaq allanngortinneqarsimavoq. Tamatumalu kingorna illoqarfiit arlallit silassaat atuarneqarsinnaajunnaarsimapput. Ilaajunnaartinneqartunut Qaanaaq akuuvoq. Tamanna atuartartunit malugineqanngitsoornissaa aviisip naatsorsuutigigaluarmagu puaatsoorujussuarput.
Allattoq Jette Andersen, Knud Reimer
februaarip 03-at 2012 10:49

Tassami atuartartut naammagittaalliortut imaaginnalermata Qaanaap silassaa ullumi ilanngunneqaqqittalerpoq.

Atuartartut ilaat, Inge Heindl Thomsen, Kirke Hyllinge-meersup nunarsuarmi silassaq atuartarnerarlugu ippassaq aviisimut allaaserivaa. Ukiorpassuit silassamik atuartartuusimammat ima allaaserisaqarpoq: "Nunat kiattut allanngorartuaannarput, Qaanaarli issinnerujuartuuvoq".

Qaanaap silassaa uterteqqinneqassangaluarpat atuartartup Ingep aviisi natsamik nuersaakkumallugu neriorsuisimavoq, ima oqaasertalerlugu:

"Ilami silassami Qaanaaq ilaanngikkaangat soorlu ilaannakuusoq".

Inge Heindl Thomsenili Qaanaap silassaata utertinneqarnissaanik noqqaassuteqartunut kisiartaanngilaq. Ilami atuartartut naammagittaalliortut amerlangaarmata Qaanaap silassaa aviisimi takussaaqqilersimavoq.

Politikenip ilusilersornissaanut qullersap nasaq nuersagaq qujarutiinnarsimagaluarpaa, Qaanaalli silassaa ilanngunneqaqqimmat Inge Heindl Thomsenip nersiorsuutini eqquutsippaa. Tassa taama nuannaartigisimavoq.

- Asulu nasaq nuersagaq Politikenimut apuuttorlu Danmarki Qaanaatungajak issitsigilerpoq Politikenillu ilusilersornissaanut qullersap nasaq imaallaat atorfissaqartilerpaa, Politiken taama naggasiivoq.

Aamma atuaruk