Atuarfiup ikuallannera 3 millionit miss. akeqassaaq
Nuummi Ukaliusap Atuarfiani ikuallanneq 2,6 milionit koruuninik naleqarsinnaasutut nalilerneqarpoq.
Nuummi Ukaliusap Atuarfiani ikuallattoqarneranut atatillugu kingorna aaqqissuioqartussaallunilu eqqiaasoqartussaavoq, aningaasartuutissallu 2 aamma 3 millionit koruunit akornanniinnissaat ilimagineqarpoq:
- Kommunip illuutaani ikuallattoqarsimappat iluarsaassinermut aningaasartuutit sillimmasiisarfinniit tamatigut akilerneqartartut, Kommuneqarfik Sermersuumi Sanaartukkanik aserfallatsaaliinermut pilersaarusiortup Frederik Grønvoldip oqaatigaa.
Sillimmasiisarfiup akiliineratigut kommunip sillimmasiinermut akilersuutigisartagaa qaffanneqassanersoq, Frederik Grønvold aperaarput, imatullu akivoq:
- Ikuallattoqakulaartillugu tamakku eqqartorneqartarput, akilersuutilli taakku nalinginnaasumik allanngorneq ajorput. Ukiumiit ukiumut nalilersorneqartarput, sillimmasiisarfiit nammineq iluminni tamakku nalilersortarpaat, aningaasartuutigisimasatik matunissaat matumani eqqarsaatigineqarluni, Frederik Grønvold, Kommuneqarfik Sermersuumeersoq oqarpoq.
Ikuallattoorfiusimasoq kommunimit sillimmasiisarfimmiillu kingorna alakkarneqarpoq, atortullu allallu ikuallassimasut nalingi eqqiaanissaq ilanngullugu 2,6 millionit koruuniunissaat ilimagineqarluni.
Ukaliusap Atuarfia pingasunut immikkoortinneqarsimavoq, immikkoortut tamarmik immikkut isaariaqarlutik, isaariarlu qiterleq meeqqanit ukiukitsunit arfininngornermi ullaassakkut ikuallatsinneqarpoq.
Meeqqat tallimat qulit 13-illu akornanni ukiullit ikuallatsitsisuusimasut paasineqarpoq.
Ukaliusap Atuarfiani 1.klassemiit 9.klassemut atuartut angajoqqaavilu kalerrinneqareerput sapaatip-akunnera uuma tamaat atuassanngikkallartut, ataasinngorpallu atuariartoqqinnissaat ilimanarluni.
Ikuallattoorfiusimasormi aaqqissorneqaqqaartussaavoq, ajunaalernermilu utaqqiisaagallartumik aniffissat aamma suliarineqartussaallutik:
- Atuarfik atoqqissinnaassaguni ikuallassimasoq immikkoortunngorlugu assersinnarlugu ajunaalernermi utaqqiisaasumik qimaaffissat sananeqaqqaartussaapput. Immikkut tummeralerlugillu matulerlugillu qimaaffissat sananeqartussaammata. Sanaartukkanik akuersisartut qatserisartullu akuersiteqqaarlugit atuarfik aatsaat ammaqqinneqarsinnaavoq, Frederik Grønvold oqarpoq.
Michael Qvistgaardip, sillimmasiisartut Codanip akissanik naliliisartuata oqaatigaa, politirapporti suli takusimannginnamikku taarseeqqusissuteqartoqassanersoq suli aalajangerneqarsinnaanngitsoq.
