Atuarfiup aqqusinikkut angallattunik nakkutilliisoqarnini unitsikkaa
Atuartut annerit ilinniartitsisorlu ataaseq ullaakkut angallattoqarnerpaanerata nalaani meeqqat isumannaatsumik atuarfimmukarsinnaanissaat isumagisaraluarpaat, biilertulli angallannermi malittarisassanik unioqqutitsissarnerat, taamaattumillu atuartunut ulorianartorsiortitsisarnerat pillugu taamanna unitsinneqarpoq, atuarfimmi siulersuisut siulittaasuat Bo Albrechtsen allappoq.
Biilertut atuarfiup eqqaani ingammik inuit ikaartarfiata eqqaani qanoq akisussaassuseqanngitsigisumik biilertarnerannik takutitsisunik, ukiumi atuarfiusumi matumani assigiinngitsunik pisoqartarsimanerarpaa.
Atuarfiup eqqaani inuit ikaartarfianni siornatigut aportittoqareerpoq, ippassarlu ullaakkut aportittoqangajalluni biilertut atuarfiup eqqaani aqqusinermi angallattunik nakkutilliisut soqutiginagit ulorianartorsiortitsillutik ingerlaannarsimammata.
Taamaattumik aqqusinermik nakkutilliisut isumannaatsuunissaat Kangillinnguit Atuarfiata pisortaata atuarfiullu siulersuisuisa akisussaaffigisinnaannagu aalajangerpaat, taamaattumillu atuartunut minnernut atuariartortunut ikiuineq unitsiinnartariaqartoq.
Ilanngullugu biilertut ingammik atuarfiit meeqqeriviillu eqqaanni, meeqqat angallavigisartagaanni angallannermut malittarisassanik malinninnerunissaat kajumissaarutigineqarpoq.
